മുംബൈ: പ്രകടനത്തിന്റെ ചില മുന് കണക്കുകള്ക്ക് പ്രസക്തിയില്ലെന്നും ഇത്തവണ ഇംഗ്ലണ്ടിനെതിരായ ടെസ്റ്റ് പരമ്പരയില് ഇന്ത്യക്കാണ് മുന്തൂക്കമെന്നും ഇംഗ്ലണ്ടിന്റെ മുന് ക്യാപ്റ്റന് അലന് ലാംബ്. ഓഗസ്റ്റ് ഒന്നിന് തുടങ്ങുന്ന ടെസ്റ്റ് പരമ്പരയില് ഇരുടീമുകള്ക്കുമുള്ള സാധ്യതകളെക്കുറിച്ച് മാധ്യമങ്ങളോടു സംസാരിക്കുകയായിരുന്നു ലാംബ്.
2011ലേയും 2014ലേയും ഇന്ത്യയുടെ മോശം പ്രകടനത്തെക്കുറിച്ച് ഇത്തവണ ആലോചിക്കേണ്ടതില്ല. വിരാട് കോഹ്ലിയും സംഘവും തന്നെയാണ് ഫേവറിറ്റുകള്, ലാംബ് പറഞ്ഞു. 2011ല് ഇംഗ്ലണ്ടിലെത്തിയപ്പോള് ഇന്ത്യ 0-4നാണു പരമ്പര നഷ്ടപ്പെടുത്തിയത്, 2016ല് വലിയ വ്യത്യാസം വന്നില്ല 1-3നായിരുന്നു പരാജയം.
എന്നാല്, ഇത്തവണ കോഹ്ലിക്കും കൂട്ടര്ക്കും വേണ്ടി പന്തയംവെക്കാന് തനിക്കു മടിയില്ലെന്നാണ് അലന് ലാംബ് പറയുന്നത്. കുറച്ചു ദിവസമായി ഇംഗ്ലണ്ടില് മഴ പെയ്യുന്നില്ല. വരണ്ട വിക്കറ്റുകളില് ടെസ്റ്റ് കളിക്കാനാണ് സാധ്യത. ഇത് കാര്യങ്ങള് ഇന്ത്യയുടെ സ്പിന്നര്മാര്ക്ക് അനുകൂലമാക്കും. ഇംഗ്ലിഷ് ഫാസ്റ്റ് ബൗളര്മാര്ക്ക് അനുകൂലമായി ക്യൂറേറ്റര്മാര് കാര്യങ്ങള് നീക്കിയാലും ചൂടുള്ള അവസ്ഥ തുടര്ന്നാല് ഇന്ത്യ അതു മുതലാക്കും, ലാംബ് പറഞ്ഞു.
ഏകദിനത്തില് സ്പിന്നര് കുല്ദീപ് യാദവിന്റെ ബൗളിങ് മികച്ചതായിരുന്നു എന്നും ലാംബ് പറഞ്ഞു. ജോ റൂട്ടും മറ്റു ചില ബാറ്റ്സ്മാന്മാരും കുല്ദീപിനെതിരെ നന്നായി കളിച്ചു. എന്നാല് ടെസ്റ്റ് ക്രിക്കറ്റില് കുല്ദീപ് ഇംഗ്ലീഷ് ബാറ്റ്സ്മാന്മാര്ക്ക് ഭീഷണിയാവും. സ്പിന്നര്മാര്ക്കെതിരെ കളിക്കുമ്പോള് റൂട്ട്, അലിസ്റ്റര് കുക്ക് എന്നിവരെ കൂടുതല് ആശ്രയിക്കേണ്ടി വരും ഇംഗ്ലണ്ടിന്. ജോസ് ബട്ട്ലര്, ജോണി ബ്രിസ്റ്റോ, ബെന് സ്റ്റോക്സ് എന്നിവര് കൂടുതല് നേരം ചെറുത്തു നിന്നു കളിച്ചില്ലെങ്കില് കാര്യങ്ങള് ഇന്ത്യയുടെ വഴിക്കാവും, ലാംബ് പറഞ്ഞു.
കൗണ്ടി ക്രിക്കറ്റ് കളിക്കുന്ന പൂജാര, ഇഷാന്ത് ശര്മ, അശ്വിന് എന്നിവരുടെ ഇംഗ്ലണ്ടിലെ സാഹചര്യങ്ങളുമായുള്ള അടുപ്പം ഇന്ത്യക്കു ഗുണമാവും. ഇഷാന്തിനൊപ്പം ബുംറയും ഉമേഷ് യാദവും മുഹമ്മദ് സമിയും ചേരുമ്പോള് ഭുവനേശ്വര് കുമാറിന്റെ അഭാവത്തെ മറികടക്കാനാവും, ലാംബ് പറഞ്ഞു.
