ചെന്നൈ: കേന്ദ്ര സർക്കാരിന്റെ ഒറ്റത്തവണ തെരഞ്ഞെടുപ്പ് ആശയത്തെ പിന്തുണച്ച് തമിഴ് സൂപ്പർ താരം രജനികാന്ത്. രാജ്യത്തെ നിയമസഭ, ലോക്‌സഭ തെരഞ്ഞെടുപ്പുകൾ ഒറ്റത്തവണ നടത്തുന്നത് ഫലപ്രദമെന്നാണ് രജനികാന്തിന്റെ അഭിപ്രായം.
‘ഒരു ഇന്ത്യ ഒരു തെരഞ്ഞെടുപ്പ്’ എന്ന ആശയം നല്ലതാണ്. അത് രാഷ്ട്രീയ പാര്‍ട്ടികള്‍ക്ക് പണവും സമയവും ലാഭിക്കുന്നതിന് സഹായിക്കുമെന്ന് അദ്ദേഹം വ്യക്തമാക്കി. തെരഞ്ഞെടുപ്പിൽ മത്സരിക്കുന്നതുമായി ബന്ധപ്പെട്ട തീരുമാനം പിന്നീടൊരിക്കൽ എടുക്കുമെന്ന് അദ്ദേഹം പറഞ്ഞു. നേരത്തെ വരാൻ പോകുന്ന നിയമസഭാ തെരഞ്ഞെടുപ്പിൽ മത്സരിക്കുമെന്ന് അദ്ദേഹം സൂചിപ്പിച്ചിരുന്നു.
സേലം ചെന്നൈ എക്സ്പ്രസ് ഹൈവേയെ കുറിച്ചുള്ള ചോദ്യത്തിന് അത്തരം പദ്ധതികള്‍ സംസ്ഥാനത്തിന് വികസനം കൊണ്ടു വരുമെന്നായിരുന്നു രജനിയുടെ മറുപടി. പക്ഷേ വന്‍കിട പദ്ധതികള്‍ നടപ്പിലാക്കുമ്പോൾ കൃഷിഭൂമിയുടെ നഷ്ടം പരമാവി ഒഴിവാക്കണമെന്നും അദ്ദേഹം പറഞ്ഞു.
തമിഴ്നാട്ടിലെ വിദ്യാഭ്യാസരംഗം മികച്ചതാണെന്നും മന്ത്രി സെങ്കോട്ടയ്യന്‍ മികച്ച പ്രവര്‍ത്തനമാണ് കാഴ്ച വയ്‌ക്കുന്നതെന്നും രജനി പറഞ്ഞു.
