ന്യൂദല്‍ഹി: ലോക ജൂനിയര്‍ അത്ലറ്റിക് മീറ്റില്‍ വിജയിയായ ഹിമ ദാസിന്റെ ദേശസ്നേഹം തന്നെ ആഴത്തില്‍ സ്പര്‍ശിച്ചതായി പ്രധാനമന്ത്രി നരേന്ദ്രമോദി. മത്സരത്തില്‍ വിജയിയായ ശേഷം ഇന്ത്യന്‍ പതാക ലഭിക്കാനാക്കായി ഹിമ തേടി നടന്നതും പുരസ്കാരദാന സമയത്ത് ഇന്ത്യന്‍ ദേശീയഗാനം ഉയര്‍ന്നു കേട്ടപ്പോള്‍ ഹിമ ദാസ് വികാരാധീനയായി കണ്ണുനീര്‍ പൊഴിച്ചതുമാണ് പ്രധാനമന്ത്രിയെ സ്പര്‍ശിച്ചത്.
തന്റെ ട്വിറ്റര്‍ അക്കൗണ്ടിലൂടെയാണ് ഹിമയുടെ ദേശസ്നേഹത്തില്‍ താന്‍ ആകൃഷ്ടനായ കാര്യം മോദി വ്യക്തമാക്കിയത്. ഹിമ വിജയിയായ നിമിഷത്തിന്റെ വിഡിയോ സഹിതമായിരുന്നു പ്രധാനമന്ത്രിയുടെ ട്വീറ്റ് .
ഇന്ത്യന്‍ ക്രിക്കറ്റ് താരം രോഹിത് ശര്‍മ, മുന്‍ ഇന്ത്യന്‍ ക്രിക്കറ്റ് താരം സച്ചിന്‍ ടെണ്ടുല്‍ക്കര്‍, ഇന്ത്യന്‍ ഫുട്ബോള്‍ ടീം ക്യാപ്റ്റന്‍ സുനില്‍ ഛേത്രി, ക്രിക്കറ്റ് താരം വീരേന്ദര്‍ സേവാഗ് തുടങ്ങിയ നിരവധി പ്രമുഖര്‍ ഹിമക്ക് അഭിനന്ദനങ്ങള്‍ അറിയിച്ച്‌ രംഗത്തെത്തിയിരുന്നു.
