മോസ്കോ: ക്രൊയേഷ്യന് വിജയാഹ്ലാദത്തിന്റെ ആഴങ്ങളില് നിന്ന് യൂറി കോര്ട്ടെക്സ് പുറത്തു വന്നത് മനോഹരമായ ഒരു ചിത്രവുമായിട്ടായിരുന്നു. കാല്പ്പന്തു മാമാങ്കത്തില് ബ്രിട്ടീഷ് മോഹങ്ങളെ ചാമ്പലാക്കിയ വിജയഗോള് നേടിയ മാരിയോ മന്സുകിച്ചിന്റെ ആഹ്ലാദാവേശത്തിന്റെ ഇത്രയും ഉജ്ജ്വലമായ ക്ലിക് ആര്ക്കും കിട്ടിയിട്ടുമില്ല. കാരണം യൂറി കോര്ട്ടെക്സ് എന്ന ഫോട്ടോഗ്രാഫര് മന്സുകിച്ചിനോട് അത്രയും അടുത്തായിരുന്നു.
മോസ്കോയിലെ ലുഷ്നികി സ്റ്റേഡിയത്തില് സെമിഫൈനല് വിജയത്തിനു ശേഷം ക്രൊയേഷ്യന് ആഹ്ലാദമലയുടെ ആഴങ്ങളില്പ്പെട്ടു പോയ ഒരു മെക്സിക്കന് ഫോട്ടോഗ്രാഫറുടെ ചിത്രകഥ ലോകകപ്പ് കളത്തിനു പുറത്തെ വിശേഷമാണിപ്പോള്. ഇംഗ്ലീഷ് ഗോള്കീപ്പര് ജോര്ദാന് പിക്ഫോര്ഡിനെ പരാജയപ്പെടുത്തി വല ചലിപ്പിച്ച ശേഷം മന്സുകിച്ച് ആഹ്ലാദം പ്രകടിപ്പിച്ച് കോര്ണര് സ്പോട്ടിലേക്ക് ഓടി. മറ്റു ക്രൊയേഷ്യന് താരങ്ങളും സൈഡ് ബെഞ്ചിലെ കളിക്കാരും ഓടിയെത്തി. സൈഡ്ലൈനില് ക്രൊയേഷ്യന് ആഘോഷത്തിന്റെ ദൃശ്യങ്ങള് പകര്ത്തിക്കൊണ്ടിരുന്ന എഫ്പി ഫോട്ടോഗ്രാഫര് യൂറി കോര്ട്ടെക്സ് ആ ആവേശത്തില്പ്പെട്ടു പോയി. മന്സുകിച്ചിനൊപ്പം കസേരയോടെ യൂറിയും ഗ്രൗണ്ടില് വീണു.
ക്രൊയേഷ്യന് താരങ്ങള് ഓരോരുത്തരായി മന്സുകിച്ചിനു മേല് വീണപ്പോള് ആ ആഹ്ലാദമലയുടെ ഏറ്റവും താഴെ കഴുത്തില് രണ്ടു ക്യാമറകളുമായി യൂറി കിടന്നു. ഗോളടിച്ചത് മന്സുകിച്ചോ യൂറിയോ എന്നു സംശയിക്കുന്ന തരത്തിലായി ആ കിടപ്പ്. ആ കിടപ്പിലും യൂറി ചിത്രങ്ങള് എടുത്തു കൊണ്ടേയിരുന്നു. അങ്ങനെ മന്സുകിച്ചിന്റെ തൊട്ടുമുന്നില് നിന്നുള്ള ക്ലിക് യൂറിയുടെ ക്യാമറയില് പതിഞ്ഞു.
തങ്ങളുടെ ആഘോഷത്തിനടിയില്പ്പെട്ട് ഒരു ഫോട്ടോഗ്രാഫര് കിടക്കുന്ന കാര്യം അപ്പോഴാണ് ക്രൊയേഷ്യന് താരങ്ങള് ശ്രദ്ധിച്ചത്. പരിക്കെന്തെങ്കിലും പറ്റിയോ എന്ന് അവര് യൂറിയോട് ചോദിക്കുന്നുണ്ടായിരുന്നു. ഒപ്പം, യൂറിയുടെ നെറുകയില് ക്രൊയേഷ്യന് ഡിഫന്ഡര് ദോമാഗോജ് വിദയുടെ വക സ്നേഹചുംബനവും.
യൂറിയുടെ ക്യാമറയില് പതിഞ്ഞ മന്സുകിച്ചിന്റെ ആഹ്ലാദ ചിത്രം ആഗോളതലത്തില് വന് പ്രചാരമാണ് നേടിയത്. സോഷ്യല് മീഡിയ ഭാഷയില് പറഞ്ഞാല്, സംഭവം വൈറലായി….
