കണ്ണൂര്: ഇന്ദിരഗാന്ധിയുടെ നേതൃത്വത്തിലുളള കോണ്ഗ്രസ് സര്ക്കാര് രാജ്യത്ത് നടപ്പിലാക്കിയ അടിയന്തിരാവസ്ഥയ്ക്കെതിരെ സംഘപരിവാര് സംഘടനകള് നടത്തിയ പോരാട്ടമാണ് ഭാരത ജനത ഇന്ന് അനുഭവിക്കുന്ന സ്വാതന്ത്ര്യത്തിന് പിന്നിലെന്ന് ഭാരതീയ ജനതാപാര്ട്ടി സംസ്ഥാന വൈസ് പ്രസിഡണ്ട് പി.എം.വേലായുധന് പറഞ്ഞു. ജനാധിപത്യ സംരക്ഷണ ദിനമായി ആചരിക്കുന്നതിന്റെ ഭാഗമായി ബിജെപി ജില്ലാ കമ്മറ്റി കണ്ണൂര് ഗുരുഭവന് ഹാളില് സംഘടിപ്പിച്ച അടിയന്തിരാവസ്ഥ വിരുദ്ധ ദിനാചരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇപ്പോള് ജനാധിപത്യത്തിനു വേണ്ടി വാദിക്കുന്ന കോണ്ഗ്രസും കമ്മ്യൂണിസ്റ്റുകളും പൗര സ്വാതന്ത്ര്യത്തിന് കൂച്ചുവിലങ്ങിട്ട അടിയന്തിരാവസ്ഥയുടെ നാളുകളില് ഇതിനെ പിന്തുണയ്ക്കുകയായിരുന്നു. വിപ്ലവം പറയുന്ന കമ്മ്യൂണിസ്റ്റ് നേതാക്കളാരും സമര രംഗത്തുണ്ടായിരുന്നില്ല. ആര്എസ്എസ് പ്രവര്ത്തകരും നേതാക്കളും അടിയന്തിരാവസ്ഥയ്ക്കെതിരെ ചെറുത്തു നില്പ്പ് നടത്തി മര്ദ്ദനം ഏറ്റുവാങ്ങുമ്പോള് കമ്മ്യൂണിസ്റ്റുകള് കാഴ്ചക്കാരായി നോക്കി നില്ക്കുകയായിരുന്നു. രാഷ്ട്രത്തിനു വേണ്ടി എന്ത് ത്യാഗവും സഹിക്കാന് മുന്നോട്ടുവന്ന നൂറുകണക്കിന് പ്രവര്ത്തകരാണ് അടിയന്തിരാവസ്ഥ കാലത്ത് സംഘപ്രസ്ഥാനങ്ങള്ക്കുണ്ടായിരുന്നത്. ഇവരുടെ പ്രവര്ത്തനവും അനുഭവങ്ങളും പുതിയ തലമുറയില്പ്പെട്ട സംഘടനാ പ്രവര്ത്തകരും നേതാക്കളും പങ്കുവെയ്ക്കുകയും ഇതില് നിന്നും പ്രചോദനം ഉള്ക്കൊണ്ട് പ്രവര്ത്തിക്കാന് തയ്യാറാകണമെന്നും അദ്ദേഹം പറഞ്ഞു.
ഇന്ന് രാജ്യത്തൊരിടത്തും ആര്ക്കും യാതൊരു വിലക്കുമില്ല. രാഷ്ട്ര വിരുദ്ധ ശക്തികള്ക്ക് മാത്രമാണ് ഗവണ്മെന്റിനെ ഭയം. രാജ്യത്തെ സമഗ്ര പുരോഗതിക്ക് വേണ്ടി പ്രവര്ത്തിക്കുന്ന ശക്തമായൊരു സര്ക്കാരാണ് രാജ്യത്ത് ഇന്ന് ഭരണം നടത്തുന്നത്. അടിയന്തിരാവസ്ഥയില് നഷ്ടപ്പെട്ട സ്വാതന്ത്ര്യം വീണ്ടെടുക്കാന് വേണ്ടി പ്രവര്ത്തിച്ച ആര്എസ്എസ് ഇന്ന് ലോകത്തെ ഏറ്റവും വലിയ സാംസ്ക്കാരിക സംഘടനയാണ്. എന്നാല് മാറിമാറി ഭരിച്ച കേരളത്തിലെ മുന്നണി സര്ക്കാരുകളും കേന്ദ്രത്തിലെ കോണ്ഗ്രസ് സര്ക്കാരുകളും അടിയന്തിരാവസ്ഥയില് പൊരുതിയവര്ക്കു വേണ്ടി ഒന്നും ചെയ്യാന് തയ്യാറായില്ല. ജനാധിപത്യ ധ്വംസനത്തിനെതിരെ പ്രവര്ത്തിക്കാന് സംഘപ്രസ്ഥാനങ്ങള് എല്ലാ കാലത്തും സജ്ജമാണ്. സംഘ പ്രസ്ഥാനങ്ങളെ ദേശസ്നേഹവും ദേശീയതയും പഠിപ്പിക്കാന് ആരും വരേണ്ടതില്ലെന്നും അദ്ദേഹം പറഞ്ഞു. അടിയന്തിരാവസ്ഥയിലടക്കം സംഘപ്രസ്ഥാനങ്ങള് നടത്തിയ പ്രവര്ത്തനങ്ങളാണ് രാഷ്ട്ര നൈതീക രംഗത്തുള്പ്പെടെ ഇന്നുണ്ടായിരിക്കുന്ന മുന്നേറ്റങ്ങള്ക്ക് കാരണമെന്നും അദ്ദേഹം പറഞ്ഞു.
ചടങ്ങില് ബിജെപി ജില്ലാ പ്രസിഡണ്ട് പി.സത്യപ്രകാശ് അധ്യക്ഷത വഹിച്ചു. സംസ്ഥാന സെല് കോഡിനേറ്റര് കെ.രഞ്ചിത്ത്, ദേശീയ സമിതിയംഗം പി.കെ.വേലായുധന്, ജില്ലാ ജനറല് സെക്രട്ടറി കെ.കെ.വിനോദ്കുമാര്, പി.മോഹന്ദാസ് തുടങ്ങിയവര് സംസാരിച്ചു. ചടങ്ങില് അടിയന്തിരാവസ്ഥ പോരാളിയും ജനസംഘം നേതാവുമായിരുന്ന തളിപ്പറമ്പിലെ കടച്ചി കണ്ണേട്ടന്റെ അനുഭവ കുറിപ്പുകള് സെല് കോഡിനേറ്റര് കെ.രഞ്ചിത്ത് സദസ്സുമായി പങ്കുവെച്ചു. ഭാരതീയ ജനസംഘത്തിന്റെ ജില്ലാ സംഘടനാ സെക്രട്ടറിയായി പ്രവര്ത്തിക്കുകയായിരുന്ന കണ്ണേട്ടന്റെ അടിയന്തിരാവസ്ഥ കാലത്തെ ത്യാഗപൂര്ണ്ണമായ പോരാട്ടങ്ങളുടെ ഓര്മ്മക്കുറിപ്പ് ചടങ്ങില് സംബന്ധിച്ചവര്ക്ക് നവ്യാനുഭവമായി. അടിയന്തിരാവസ്ഥ കാലത്തെ അനുഭവങ്ങള് ചടങ്ങില് സംബന്ധിച്ച പലരും സദസ്സുമായി പങ്കുവെയ്ക്കുകയുണ്ടായി.
