പയ്യാവൂര്: ഫെയ്സ്ബുക്ക്, വാട്സ് ആപ്പ് തുടങ്ങിയ നവ സമൂഹമാധ്യമങ്ങളില് വ്യാപകമായി തുടര്ന്നു വരുന്ന വ്യാജപ്രചരണങ്ങള്ക്കെതിരെ കര്ശനമായ ശിക്ഷാ നടപടികള് സ്വീകരിക്കാന് സര്ക്കാര് സംവിധാനങ്ങള് കൂടുതല് ജാഗ്രത പുലര്ത്തണമെന്ന് വൈഎംസിഎ ചെമ്പേരി യൂണിറ്റ് കമ്മിറ്റി ആവശ്യപ്പെട്ടു. കണ്ണൂര് ജില്ലയിലെ മലയോര ഗ്രാമമായ നെല്ലിക്കുറ്റിയില് മരിച്ചയാള് എഴുന്നേറ്റിരുന്നതായി ചിത്രമുള്പ്പെടെ സന്ദേശം പ്രചരിക്കപ്പെട്ട സാഹചര്യത്തിലാണിത്. അന്ത്യശുശ്രൂഷ ചെയ്തു കൊണ്ടിരുന്ന വൈദീകനും കൂടെയുള്ളവരും ഭയന്നോടിയെന്ന് ചേര്ത്തത് നെല്ലിക്കുറ്റി ദേവാലയത്തിലെ പുരോഹിതനും നാട്ടുകാര്ക്കും അപമാനകരമായെന്നും യോഗം ചൂണ്ടിക്കാട്ടി. ഈ വ്യാജസന്ദേശം ആദ്യമായി സമുഹമാധ്യമത്തിന് പോസ്റ്റ് ചെയ്തയാളെ കണ്ടെത്തി മാതൃകാപരമായി ശിക്ഷിക്കണമെന്നും വൈഎംസിഎ ഭാരവാഹികള് ആവശ്യപ്പെട്ടു. ചെമ്പേരി വൈഎംസിഎ പ്രസിഡന്റ് സിബി പുന്നക്കുഴിയില് അധ്യക്ഷത വഹിച്ചു. മാത്യു എഴുതനമലയില്, മാത്യു അടുപ്പുകല്ലിങ്കല്, ജോസ് മേമടത്തില്, ഇമ്മാനുവല് ജോര്ജ്, സിബി പിണക്കാട്ട്, ജോമി ചാലില്, ആന്റണി മായയില്, ഷൈബി കുഴിവേലിപ്പുറത്ത്, ജോഷി കുന്നത്ത് എന്നിവര് പ്രസംഗിച്ചു.
















