മാഡ്രിഡ്: എന്തിന്? ഇതിഹാസ താരം സിനദിന് സിദാന്റെ തീരുമാനത്തില് ഞെട്ടലായിരുന്നു ആരാധകര്ക്ക്. തുടര്ച്ചയായ മൂന്നാമത്തെ ചാംപ്യന്സ് ട്രോഫി കിരീടത്തിലേയ്ക്ക് റയല് മാഡ്രിഡിനെ നയിച്ച് അഞ്ചുദിവസങ്ങള്ക്കു ശേഷം സിനദിന് പ്രഖ്യാപിച്ചു, ഞാന് പരിശീലക സ്ഥാനം ഒഴിയുന്നു.
കളത്തിലും പുറത്തും എപ്പോഴും അപ്രതീക്ഷിത നീക്കങ്ങളിലൂടെയും തീരുമാനങ്ങളിലൂടെയും വ്യത്യസ്തനാവാറുള്ള മുന് ഫ്രഞ്ച് താരം ഇത്തവണയും പതിവു തെറ്റിച്ചില്ല. റയലിന്റെ പ്രസിഡന്റ് ഫ്ളോറെന്റീനോ പെരസിനൊപ്പം പത്രസമ്മേളനത്തിനു വന്നിരിക്കുമ്പോള് ആരും പ്രതീക്ഷിച്ചില്ല, ഈ പ്രഖ്യാപനം.
പറയാനുള്ളത് അത്ര നല്ല കാര്യമല്ലെന്ന് പലരും തിരിച്ചറിഞ്ഞിരുന്നു ഫ്ളോറെന്റീനോയുടെ മുഖത്തു നിന്ന്. എന്നാല് പ്രശസ്തനായ ഏതോ താരം ക്ലബ്ബു വിടുന്നതിനെക്കുറിച്ചു പറയാനാവും എന്നാണ് എല്ലാവരും കരുതിയത്.
അപ്പോഴേക്ക് സിനദിന് അതു പറഞ്ഞു, ‘ഞാന് റയല് വിടുന്നു. അടുത്ത സീസണില് പരിശീലകനായി ഞാനുണ്ടാവില്ല. 2020 വരെ തുടരാം എന്നാണ് കരാര്. അതു വരെ കാത്തു നില്ക്കുന്നില്ല.’
കാരണമാരാഞ്ഞ് ചോദ്യങ്ങള് തുടര്ച്ചയായി വന്നപ്പോള് ചെറുചിരിയോടെ സിനദിന് പറഞ്ഞു, ‘ഈ ക്ലബ്ബിനെ ഞാന് സ്നേഹിക്കുന്നു. എനിക്കു നല്കാവുന്നതൊക്കെ നല്കിക്കഴിഞ്ഞു. പുതുമയുള്ളതും വ്യത്യസ്തമായതുമായ ശബ്ദങ്ങള് കേള്ക്കേണ്ടതുണ്ട് ഇനി.’
2016 ജനുവരിയില് സിനദിന് ഹെഡ് കോച്ച് ആയി വന്നതിനു ശേഷം ആറു പ്രധാനപ്പെട്ട കിരീടങ്ങളാണ് റയല് നേടിയത്. സ്പാനിഷ് ലീഗില് മൂന്നാം സ്ഥാനത്തായിപ്പോയി എന്നതു മാത്രമാണ് തിരിച്ചടി. ചാംപ്യന്സ് ലീഗ് കിരീടം സ്വന്തമാക്കി ആ തിരിച്ചടി സിനദിന് മറന്നു. 26 നായിരുന്നു ലിവര്പൂളുമായുള്ള ഫൈനല്. കൃത്യം അഞ്ചാം ദിവസം റയല് വിട്ടു പോകുന്നു സിനദിന്.
‘വളരെ വിഷമം പിടിച്ച തീരുമാനമാണിത്. എനിക്കും മറ്റുള്ളവര്ക്കും മാറ്റം ആവശ്യമാണെന്നു തോന്നി. എന്റെ മാത്രം തീരുമാനമാണിത്. ഒരു പക്ഷേ, അതു തെറ്റായിരിക്കാം. പക്ഷേ, ഇതാണു സമയം എന്നെനിക്കു തോന്നുന്നു. കളിക്കാരില് നിന്ന് കൂടുതല് ആവശ്യപ്പെടാന് ഇനി എനിക്കാവില്ല.’ ലാ ലിഗയില് മൂന്നാം സ്ഥാനത്തായിപ്പോയതും ഡൊമസ്റ്റിക് കപ്പില് ക്വാര്ട്ടറില് തോറ്റതും എനിക്കു പെട്ടെന്നു മറക്കാനാവില്ലെന്നും സിനദിന് പറഞ്ഞു.
റയലില് കളിക്കാരന് എന്ന നിലയിലും പരിശീലകന് എന്ന നിലയിലും തന്നെ പിന്തുണച്ച ആരാധകര്ക്ക് സിനദിന് നന്ദി പറഞ്ഞു. തുടര്ച്ചയായി മൂന്നാം വട്ടവും ചാംപ്യന്സ് ലീഗ് വിജയിക്കാനായത് ജീവിതത്തിലെ മനോഹരമായ മുഹൂര്ത്തമായിരുന്നു. സിനദിന് പറഞ്ഞു.
