ബര്ലിന്: റഷ്യയില് സുവര്ണാവസരം മുതലാക്കാനുളള ഒരുക്കത്തിലാണ് നലിവിലെ ചാമ്പ്യന്മാരായ ജര്മനിയും കോച്ച് ജോക്കിം ലോവും. കിരീടം കൈപ്പിടിയിലൊതുക്കിയാല് ജര്മനിയും കോച്ചും ലോകകപ്പ് ചരിത്രത്തിന്റെ ഭാഗമാകും. ഒരു കോച്ചിന്റെ കീഴില് തുടര്ച്ചയായി രണ്ട് തവണ ലോക കിരീടം സ്വന്തമാക്കിയ രണ്ടാമത്തെ ടീമെന്ന ബഹുമതി ജര്മനിക്ക് സ്വന്തമാകും. ഇറ്റലിയാണ് ഒരു കോച്ചിന്റെ കിഴീല് തുടര്ച്ചയായി രണ്ട് തവണ ലോകകപ്പ് നേടിയ ഏക ടീം. 1934,1938 വര്ഷങ്ങളില് വിറ്റോറിയോ പോസയാണ് ഇറ്റലിയെ ചാമ്പ്യന്മാരാക്കിയത്. ബ്രസീല് 1958, 1962 വര്ഷങ്ങളില് തുടര്ച്ചയായി ലോകകപ്പ് ജേതാക്കളായി. പക്ഷെ വ്യത്യസ്ത കോച്ചുകളുടെ കീഴിലാണ് അവര് കിരീടം നേടിയത്.
മിറോസ്ലാവ് ക്ലോസെ, ഫിലിപ്പ് ലാം തുടങ്ങിയ പ്രമുഖര് ടീമിലില്ലെങ്കിലും ജര്മനിക്ക് ഇത്തവണത്തെ ലോകകപ്പില് വിജയിക്കാനാകുമെന്ന് കോച്ച് ജോവാച്ചിം ലിയോ. തുടര്ച്ചയായ രണ്ട് ലോകകപ്പുകള് നേടുക വിഷമകരമാണ്. എന്നിരുന്നാലും വിജയത്തിനായി എല്ലാ അടവുകളും പുറത്തെടുക്കും. ഒരു ലോകകപ്പ് വിജയിക്കുന്നത് തന്നെ മഹത്തായ കാര്യമാണ്. കരീടം നിലനിര്ത്താന് കൈവന്ന സുവര്ണ്ണാവസരം പാഴാക്കില്ല.
പക്ഷെ ചരിത്രം ജര്മനിക്ക് അനുകൂലമല്ല. 2017 ല് കോണ്ഫെഡറേഷന് കപ്പ് ജേതാക്കളാണ് ജര്മനി. കോണ്ഫെഡറേഷന് കപ്പ് നേടിയ ടീം അതിനു ശേഷം നടന്ന ലോകകപ്പുകളില് കിരീടമണിഞ്ഞിട്ടില്ലെന്നാതാണ് ഇതുവരെയുള്ള ചരിത്രം. ഈ ചരിത്രം തിരുത്തിയെഴുമെന്ന ഉറച്ച വിശ്വാസത്തിലാണ് ജര്മന് കോച്ച്.
തീവ്ര പരിശീലത്തിലേര്പ്പെട്ടിരിക്കുന്ന യുവനിരയാണ് കോച്ചിന്റെ പിന്ബലം. വര്ഷങ്ങളായി പരിശീലനം ലഭിച്ചു വരുന്ന യുവാക്കള് ഏതു വമ്പന്മാരെയും നേരിടാനുള്ള കരുത്ത് ആര്ജ്ജിച്ചുകഴിഞ്ഞു. ക്ലോസെയും ലാമും ടീമിലില്ലെങ്കിലും യുവാക്കളുടെ കരുത്തില് കിരീടം പിടിക്കും.
യുവ താരമായ ടിമോ വെര്നറാണ് ആക്രമണത്തില് ജര്മനിയുടെ കരുത്ത്. റെഡ് ബുള് ലീപ്സിഗ് താരമായ ടിം അവസാന രണ്ട് സീസണുകളില് 21 ഗോള് വീതം നേടിയിട്ടുണ്ട്. മധ്യനിരയില് മരിയോ ഗോമസ്, ലിറോയ് സെയ്ന്, ടോണി ക്രൂസ് എന്നിവരാണ് ശക്തികേന്ദ്രങ്ങള്.
ഈ സീസണില് പരിക്ക് മൂലം പലകളികളില് നിന്ന് വിട്ടുനില്ക്കേണ്ടിവന്ന ഗോള് കീപ്പര് മാനുവല് ന്യൂയര് റഷയില് കളിക്കുമെന്നാണ് പ്രതീക്ഷ. ലോകത്തെ മികച്ച ഗോള് കീപ്പര്മാരിലൊരാളാണ് ഒരാളാണ് ന്യൂയര്. റഷ്യയില് ഗ്രൂപ്പ് എഫിലാണ് ജര്മനി മത്സരിക്കുക. മെക്സിക്കോ, സ്വീഡന്, ദക്ഷിണ കൊറിയ എന്നിവയാണ് മറ്റ് ടീമുകള്. ആദ്യ മത്സരത്തില് ജര്മനി ജൂണ് 17 ന് മെക്സിക്കോയെ നേരിടും.
