ബെംഗളൂരു: കര്ണാടകത്തിലെ കോണ്ഗ്രസ് ജെ ഡിഎസ് ബാന്ധവത്തില് ഇനിയും അവ്യക്തതകളേറെ. മുഖ്യമന്ത്രി കുമാരസ്വാമിയെ അഞ്ചുവര്ഷം പിന്തുണയ്ക്കുന്ന കാര്യം തീരുമാനിച്ചിട്ടില്ലെന്ന് കോണ്ഗ്രസ് നേതാവും ഉപമുഖ്യമന്ത്രിയുമായ ജി. പരമേശ്വര . കുമാരസ്വാമിയുടെ സ്ഥാനാരോഹണത്തോടെ പരിസമാപ്തിയായെന്നു കരുതിയ രാഷ്ട്രീയ നാടകങ്ങള് ഇനിയും പ്രതീക്ഷിക്കാമെന്നാണ് പരമേശ്വരയുടെ പ്രസ്താവനകള് വെളിപ്പെടുത്തുന്നത്.
ഭൂരിപക്ഷം തെളിയിച്ച്, വകുപ്പു വിഭജനം നടത്തി, നല്ല ഭരണം കാഴ്ചവെയ്ക്കുക എന്നതിനാണ് പ്രഥമ പരിഗണന നല്കുന്നത്. മുഖ്യമന്ത്രിയക്ക് അഞ്ചുവര്ഷം മുഴുവന് പിന്തുണ നല്കണോ വേണ്ടയോ എന്ന കാര്യങ്ങളെല്ലാം പിന്നീട് തീരുമാനിക്കുമെന്ന് ഉപ മുഖ്യമന്ത്രിയായി സ്ഥാനമേറ്റ ശേഷം നടത്തിയ പത്ര സമ്മേളനത്തില് പരമേശ്വര പറഞ്ഞു.
അതേസമയം മുഖ്യമന്ത്രിപദം കൈമാറേണ്ടി വരുന്നതിനെക്കുറിച്ചുള്ള സാധ്യതകള് കുമാരസ്വാമി നേരത്തേ തന്നെ നിരാകരിച്ചിരുന്നു. അത്തരം സംഭാഷണങ്ങളൊന്നും നടന്നിട്ടില്ലെന്ന് അദ്ദേഹം മാധ്യമങ്ങങ്ങളെ അറിയിക്കുകയും ചെയ്തു. വെറും 37 എംഎല്എ മാരുടെ മാത്രം പിന്തുണയുള്ള കുമാരസ്വാമിക്ക് മുഖ്യമന്ത്രിയായി തുടരണമെങ്കില് കോണ്ഗ്രസിനെ പൂര്ണമായും ആശ്രയിക്കേണ്ട അവസ്ഥയാണുള്ളത്. ഇതൊരു ‘മാതൃകാസഖ്യ’ മാക്കി മാറ്റുകയാണ് ലക്ഷ്യമെന്നും മറ്റുനടപടിക്രമങ്ങളെല്ലാം ഇരുപാര്ട്ടികളും യോഗം ചേര്ന്ന് തീരുമാനിക്കുമെന്നും കുമാര സ്വാമി പറഞ്ഞു.
