പഴകും തോറും വീര്യം കൂടിയ വീഞ്ഞ്- റോജര് മില്ല എന്ന ഇതിഹാസ താരത്തിന് ചേര്ന്ന വിശേഷണമാണിത്. പ്രതിഭ ഏറെയുണ്ടായിരുന്നിട്ടും കരിയര് പാതിവഴിയില് ഉപേക്ഷിക്കുക. പിന്നീട് അപ്രതീക്ഷിത തിരിച്ചുവരവിലൂടെ ഹീറോയായി മാറുക. ലോകകപ്പ് ഫുട്ബോള് ചരിത്രത്തിലെ അത്ഭുത താരങ്ങളുടെ നിരയില് ഇടംലഭിക്കാന് അതിലേറെ എന്തുവേണം. 1994-ല് 42-ാം വയസില് ലോകകപ്പ് കളിക്കാനെത്തിയ മില്ല റഷ്യയുടെ വലയില് പന്തടിച്ചു കയറ്റി ഏറ്റവും പ്രായം കൂടിയ ഗോള് സ്കോറര് എന്ന റെക്കോര്ഡും കുറിച്ചു. ആല്ബര്ട്ട് റോജര് മൂഹ് മില്ലര് എന്നാണ് റോജര് മില്ലയുടെ യഥാര്ത്ഥ പേര്.
സ്വന്തംനാട്ടിലും ഫ്രാന്സിലുമൊക്കെ ക്ലബ്ബ് ഫുട്ബോള് കളിച്ചു നടന്ന മില്ലയ്ക്ക് 1978ലാണ് കാമറൂണ് ടീമില് ഇടംലഭിച്ചത്. 1982-ലെ സ്പാനിഷ് ലോകകപ്പില് അരങ്ങേറ്റം. പെറുവുമായുള്ള ആദ്യ മത്സരത്തില് മില്ല വലകുലുക്കിയെങ്കിലും റഫറി ഗോള് അനുവദിച്ചില്ല. മത്സരം ഗോള്രഹിത സമനിലയില് അവസാനിച്ചു. പോളണ്ടിനോടും കാമറൂണ് ഗോളടിക്കാതെ സമനില പാലിച്ചു. എന്നാല് മൂന്നാം മത്സരത്തില് കരുത്തരായ ഇറ്റലിയെ 1-1ന് തളച്ച അത്ഭുതംകാട്ടി. അങ്ങനെ ഒരു മത്സരംപോലും തോല്ക്കാതെ പുറത്താകുന്ന ടീമെന്ന പ്രത്യേകതയുമായി കാമറൂണ് മടങ്ങി . 1984 ലോസ് ആഞ്ചലസ് ഒളിമ്പിക്സിലും മില്ല രാജ്യത്തിന്റെ കുപ്പായമണിഞ്ഞിരുന്നു. എന്നാല് 1987-ല് മില്ല അന്താരാഷ്ട്ര ഫുട്ബോളിനോട് വിടപറഞ്ഞു.
1990-ല് ലോകകപ്പ് അടുത്തുവരവെ കാമറൂണ് ടീമില് അന്തഃഛിദ്രങ്ങള് കലശലായി. മാധ്യമങ്ങളെല്ലാം മില്ലയുടെ തിരിച്ചുവരവിനുവേണ്ടി മുറവിളികൂട്ടിയ സമയം. ഒടുവില് പ്രസിഡന്റ് പോള് ബിയ മില്ലയെ ഫോണില് വിളിച്ച് വിരമിക്കല് തീരുമാനം പിന്വലിക്കണമെന്ന് ആവശ്യപ്പെട്ടു. അങ്ങനെ ആ വര്ഷത്തെ ഇറ്റാലിയന് ലോകകപ്പിലൂടെ മില്ല വീണ്ടും രാജ്യത്തിന്റെ കുപ്പായം ഇട്ടു. നാല് ഗോളുകളുമായി സൂപ്പര്താരം മിന്നിത്തിളങ്ങിയപ്പോള് കാമറൂണ് അനായാസം ക്വാര്ട്ടറില്. ചരിത്രത്തില് ആദ്യമായിട്ടായിരുന്നു ഒരു ആഫ്രിക്കന് ടീം ലോകകപ്പിന്റെ അവസാന എട്ടില് ഇടംപിടിക്കുന്നത്. 2002-ല് സെനഗലും 2010-ല് ഘാനയും കാമറൂണിന്റെ നേട്ടം ആവര്ത്തിച്ചിട്ടുണ്ട്്.
അര്ജന്റീനയെന്ന അതികായരെ എതിരില്ലാത്ത ഒരു ഗോളിന് ഞെട്ടിച്ചായിരുന്നു ഇറ്റലിയില് കാമറൂണ് കാംപയിന് ആരംഭിച്ചത്. ആ മത്സരത്തില് മില്ല സ്കോര് ചെയ്തില്ല. എന്നാല് റുമാനിയക്കെതിരായ ജയത്തിലെ രണ്ടു ഗോളുകളും മില്ല സംഭാവന നല്കി. കൊളംബിയയോടുള്ള പ്രീ- ക്വാര്ട്ടറില് മില്ലയുെട വിശ്വരൂപം ലോകം ദര്ശിച്ചു. ഗോള് പിറക്കാത്ത നിശ്ചിത സമയത്തിനുശേഷം മത്സരം എക്സ്ട്രാ ടൈമിലേക്ക്. 106, 108 മിനിറ്റുകളില് മില്ലയുടെ ബൂട്ട് ശബ്ദിച്ചപ്പോള് ലാറ്റിനമേരിക്കന് ടീമിന്റെ സ്വപ്നങ്ങള് എരിഞ്ഞടങ്ങി. 115-ാംമിനിറ്റില് കൊളംബിയയുടെ റെഡിന് നേടിയ ഗോള് ആഫ്രിക്കന് സിംഹങ്ങളെ തടയാന് പോരായിരുന്നു. പോസ്റ്റിലേക്ക് ഊളിയിടുന്ന പന്തിനെ വായുവില് മുന്നോട്ടു ഉയര്ന്നു ചാടി പിന്കാലുകൊണ്ടു തട്ടിയകറ്റുന്ന സ്കോര്പിയന് കിക്കിലൂടെ അതിസാഹസികതയുടെ പര്യായം തീര്ത്ത വിഖ്യാത കൊളംബിയന് ഗോളി റെനെ ഹിഗ്വിറ്റയെ അതിശയിപ്പിച്ച് 35 വരെ അകലെനിന്നു മില്ല തൊടുത്ത ഉശിരന് ഷോട്ട് കളികമ്പക്കാരുടെ മനസ്സില് എന്നെന്നും നിറഞ്ഞു നില്ക്കുന്ന ഒന്നായി. ക്വാര്ട്ടറില് ഇംഗ്ലണ്ടിനോട് പൊരുതിവീഴുമ്പോഴേക്കും മില്ലയും കാമറൂണും ഇറ്റലിയുടെ ഗാലറികളെ കീഴടക്കിക്കഴിഞ്ഞിരുന്നു. കോര്ണര് ഫ്ളാഗിനടുത്ത് ചെന്ന് നൃത്തം ചെയ്ത് ഗോള് ആഘോഷിക്കുന്ന മില്ല സ്റ്റൈല് പേരുകേട്ടതും ആ ലോകകപ്പില് തന്നെ. 1994 അമേരിക്കന് ലോകകപ്പില് ഗ്രൂപ്പ് ഘട്ടത്തില് കാമറൂണ് പുറത്തായി.
1984, 88 വര്ഷങ്ങളില് ആഫ്രിക്കന് നേഷന്സ് കപ്പ് നേടിയ കാമറൂണ് ടീമിന്റെ ഭാഗമായിരുന്നു മില്ല. 1986-ല് ആഫ്രിക്ക നേഷന്സ് കപ്പിലെ മികച്ച താരവും 1986, 88 വര്ഷങ്ങളില് ഇതേ ടൂര്ണമെന്റിലെ ടോപ്സ്കോററും 1990ലെ ഇറ്റാലിയന് ലോകകപ്പിലെ മൂന്നാമത്തെ ടോപ്സ്കോറര്ക്കുള്ള വെങ്കലപാദുകവും മില്ല സ്വന്തമാക്കി.
