കൊച്ചി: മെട്രോ നഗരമായ കൊച്ചിയെ ഹരം കൊള്ളിക്കാന് താരങ്ങള് ഇന്നു മണ്ണിലേക്കിറങ്ങും. ജന്മഭൂമിയുടെ രണ്ടാമത് ചലച്ചിത്ര പുരസ്കാരങ്ങളും ലജന്ഡ്സ് ഓഫ് കേരള അവാര്ഡും ഇന്ന് സമ്മാനിക്കും. വൈകിട്ട് 5.30ന് കലൂര് അന്താരാഷ്ട്ര സ്റ്റേഡിയത്തില് പ്രത്യേകം സജ്ജമാക്കിയ ഹൈടെക് വേദിയിലാണ് പുരസ്കാര വിതരണം.
ലജന്ഡ്സ് ഓഫ് കേരള പുരസ്കാരം ആയുര്വേദ പണ്ഡിതന് ഡോ.പി.കെ. വാര്യര്ക്കും നടന് മധുവിനും സമ്മാനിക്കും. കേന്ദ്രമന്ത്രി അര്ജ്ജുന് റാം മേഘ്വാള് ഉദ്ഘാടനം ചെയ്യും. ജന്മഭൂമി ചെയര്മാന് കുമ്മനം രാജശേഖരന് അധ്യക്ഷനാകും. സംവിധായകനും ഗാനരചയിതാവുമായ ശ്രീകുമാരന് തമ്പിയെ പ്രത്യേക പുരസ്കാരം നല്കി ആദരിക്കും. ചലച്ചിത്ര രംഗത്ത് അരനൂറ്റാണ്ട് പിന്നിട്ട കെപിഎസി ലളിത, കുഞ്ചന്, പ്രേംപ്രകാശ് എന്നിവരും ആദരം ഏറ്റുവാങ്ങും. ചുരുങ്ങിയ സമയം കൊണ്ട് സിനിമ പൂര്ത്തിയാക്കി റിലീസ് ചെയ്തതിന് ഗിന്നസ് ബുക്കില് ഇടം നേടിയ വിശ്വഗുരു എന്ന ചിത്രത്തിന്റെ സംവിധായകന് വിജീഷ് മണിയെയും നിര്മ്മാതാവ് എ.വി. അനൂപിനെയും ആദരിക്കും.
വിവിധ മേഖലകളില് വ്യക്തിമുദ്ര പതിപ്പിച്ചവര്ക്കുള്ള ജന്മഭൂമി പുരസ്കാരവും വിതരണം ചെയ്യും. എ.വി. പുരുഷോത്തമ കമ്മത്ത് (കാര്ഷികം), വി.എസ്. രാമകൃഷ്ണന് (സാമൂഹ്യപ്രവര്ത്തനം), ഡോ.എസ്.കെ. സുന്ദരമൂര്ത്തി (ആരോഗ്യം), രാഹുല് വി.രാജ് (കായികം) എന്നിവര്ക്കും സേവന മേഖലയ്ക്കുള്ള പുരസ്കാരം കോതമംഗലത്തെ സേവാകിരണും നല്കും. 2017ലെ ചലച്ചിത്ര പുരസ്കാരങ്ങളും വിതരണം ചെയ്യും. സംവിധായകന് പ്രിയദര്ശന് ഉള്പ്പെടെ ചലച്ചിത്ര മേഖലയിലെ പ്രമുഖര് പങ്കെടുക്കും.
നൃത്തവും സംഗീതവും ഹാസ്യവും ഇടകലര്ന്ന താരനിശ പരിപാടിക്ക് മാറ്റുകൂട്ടും. കഴിഞ്ഞ വര്ഷത്തെ കണ്ടെത്തലായ മലയാള സിനിമയിലെ നായികമാരായ നിമിഷ സജയന്, ദുര്ഗ്ഗ കൃഷ്ണ, അശ്വതി മനോഹര് എന്നിവരാണ് നൃത്തത്തിന് നേതൃത്വം നല്കുന്നത്. ഒപ്പം, തന്മാത്ര ഫെയിം അര്ജുന് ലാലുമുണ്ട്. പ്രശസ്ത കൊറിയോഗ്രാഫര് ബിജു സേവിയറാണ് നൃത്തം ചിട്ടപ്പെടുത്തിയത്.
അവാര്ഡ് വാങ്ങാനും നല്കാനുമായി മലയാള സിനിമയിലെ പ്രമുഖര് എത്തും. പ്രമുഖ സംവിധായകന് ജി.എസ്. വിജയനാണ് താരനിശയുടെ ആവിഷ്ക്കരണം. സംഗീത സംവിധായകന് ബിജിബാലാണ് സംഗീത വിഭാഗത്തിന് നേതൃത്വം നല്കുക. പതിനായിരം പേര്ക്ക് ഇരിക്കാവുന്ന പടുകൂറ്റന് പന്തലാണ് ഒരുക്കിയിരിക്കുന്നത്. എംപിമാരായ കെ.വി. തോമസ്, വി. മുരളീധരന്, പ്രജ്ഞാ പ്രവാഹ് അഖിലേന്ത്യാ സംയോജകന് ജെ. നന്ദകുമാര്, ഹൈബി ഈഡന് എംഎല്എ, കൊച്ചി മേയര് സൗമിനി ജയിന് തുടങ്ങിയവരും പങ്കെടുക്കും. ചലച്ചിത്ര നിര്മ്മാതാവ് ജി. സുരേഷ്കുമാറിന്റെ മേല്നോട്ടത്തിലാണ് പരിപാടികള്.
ജന്മഭൂമി ഓൺലൈനിലും എസിവി ഉത്സവിലും ലൈവ്
ജന്മഭൂമി പുരസ്കാര രാവ് ജന്മഭൂമി ഓണ്ലൈനിന്റെ ഔദ്യോഗിക ഫെയ്സ്ബുക്ക് പേജ് വഴി ലൈവായി പ്രേക്ഷകരിലേക്ക് www. facebook.com/janmabhumidailyഎന്ന പേജിലൂടെയാണ് പരിപാടി ലൈവായി ലഭിക്കുക. എസിവി ഉത്സവ് ചാനലിലും തത്സമയ സംപ്രേഷണമുണ്ട്. www.asianet india.com ല് കാണാം.
