കോട്ടയം: നക്ഷത്രശോഭയോടെ പ്രഥമ ജന്മഭൂമി ടെലിവിഷൻ അവാർഡ് നിശ ദൃശ്യം 2018 ഇന്ന് കോട്ടയം ബസേലിയോസ് കോളേജ് ഗ്രൗണ്ടിൽ അരങ്ങേറും. വൈകീട്ട് 5.30ന് കോട്ടയത്തെ ഇളക്കിമറിക്കുന്ന കലാവിരുന്നിന് തിരിതെളിയും. നൃത്തവും സംഗീതവും ഹാസ്യവും കോർത്തിണക്കി ജിഎസ് വിജയൻ അണിയിച്ചൊരുക്കുന്ന കലാസന്ധ്യയിലാണ് കഴിഞ്ഞ വർഷത്തെ ടെലിവിഷൻ പുരസ്കാരം വിതരാണം ചെയ്യുന്നത്. ദേശീയ ചലച്ചിത്ര അവാർഡ് നേടിയ ചലച്ചിത്ര പ്രവർത്തകരെയും പരിപാടിയിൽ ആദരിക്കും. സമഗ്ര സംഭാവനയ്ക്ക് ജികെ പിള്ളയെ ആദരിക്കും. ജന്മഭൂമിയുടെ ചരിത്രം വിശദമാക്കുന്ന ഹ്രസ്വ ചിത്രവും കഴിഞ്ഞ വർഷം നടന്ന ജന്മഭൂമി ഫിലിം അവാർഡിന്റെ പ്രസക്തഭാഗങ്ങളും പ്രദർശിപ്പിക്കും. എസ് രമേശൻ നായർ രചിച്ച് രമേശൻ നായർ ഈണം പകർന്ന അവതരണ ഗാനത്തോടെയാണ് പരിപാടിക്ക് തുടക്കമാകുന്നത്.
സാജൻസൂര്യ(മികച്ച നടൻ), ഗായത്രി അരുൺ(മികച്ച നടി), രാഘവൻ(സ്വഭാവ നടൻ), കെ ആർ വിജയ(സ്വഭാവ നടി), വിവേക് ഗോപൻ(ജനപ്രിയ നടൻ), ഷാലു കുര്യൻ (ജനപ്രിയ നടി), നസീർ സംക്രാന്തി(ഹാസ്യ നടൻ), നിഷ സാരംഗി(ഹാസ്യ നടി) ഗൗരി കൃഷ്ണൻ( ബാലതാരം), ജെ പള്ളാശേരി(തിരക്കഥ), ബിനു വെള്ളത്തൂവൽ(സംവിധായകൻ), ജയകുമാർ(മികച്ച സീരിയൽ), രമാദേവി(രണ്ടാമത്തെ സീരിയൽ), ആർ ഉണ്ണികൃഷ്ണൻ(ഹാസ്യ പരിപാടി), സുനീഷ്(ഛായഗ്രഹണം), രാജേഷ് (എഡിറ്റർ), അനീഷ് (കലാസംവിധാനം), ഷോബി തിലകൻ(ഡബ്ബിങ്), സൈറ(ഡബ്ബിങ്) എന്നിവരെയാണ് അവാർഡ് നൽകി ആദരിക്കുന്നത്.
അനിൽ ബാനർജി, ശ്രീകണ്ഠൻ നായർ, ആർ ബാലകൃഷ്ണൻ, ടിജി മോഹൻദാസ്, എന്നിവർക്ക് പ്രത്യേക പുരസ്കാരം നൽകി ആദരിക്കും. ദേശീയ അവാർഡ് ജേതാക്കളായ ജയരാജ്, സജീവ് പഴൂർ, നിഖിൽ എസ് പ്രവീൺ, ദിലീഷ് പോത്തൻ, സന്ദീപ് സോനൻ, അനീഷ് ജേക്കബ്, എന്നിവരെയും ആദരിക്കുന്നുണ്ട്.
താരനിശയുടെ ഉദ്ഘാടനം രാജ്യസഭാ ഉപാദ്ധ്യക്ഷൻ പ്രൊഫ. പിജെ കുര്യൻ നിർവ്വഹിക്കും. നടൻ ബിജു മേനോൻ മുഖ്യാതിഥിയായി പങ്കെടുക്കും. ബിജെപി സംസ്ഥാന അദ്ധ്യക്ഷൻ കുമ്മനം രാജശേഖരൻ, ജോസ് കെ മാണി എംപി, തിരുവഞ്ചൂർ രാധാകൃഷ്ണൻ എംഎൽഎ, നഗരസഭാ അധ്യക്ഷ പിആർ സോന എന്നിവർ ചടങ്ങിനെ ധന്യമാക്കും.
