തലശ്ശേരി: നഗരമധ്യത്തിലെ മെയിന് റോഡില് ആഭരണ വ്യാപാരിയെ മുഖത്ത് മുളക് പൊടി വിതറി സ്വര്ണ്ണാഭരണങ്ങള് സൂക്ഷിച്ച ബാഗ് തട്ടിയെടുത്ത് രക്ഷപ്പെട്ടവരെ കണ്ടെത്താന് തലശ്ശേരി പോലീസ് അന്വേ ഷ ണം ഊര്ജിതമാക്കി. പള്ളൂരിലെ സ്റ്റാര് ജ്വല്ലറി ഉടമ തലശ്ശേരി അച്ചാരത്ത് റോഡിലെ ഉഷസില് പ്രദീപിനെയാണ് രണ്ട് ബൈക്കുകളിലായെത്തിയ നാലംഗ സംഘം വെള്ളിയാഴ്ച രാത്രിയില് കൊള്ളയടിച്ചത് . കൊള്ളസംഘം തട്ടിയെടുത്ത ബാഗില് എട്ട് പുതിയ വളകളും പഴയ ആഭരണങ്ങളും ഉള്പ്പെടെ 48 പവന് സ്വര്ണ്ണമുണ്ടെന്ന് പ്രദീപ് തലശ്ശേരി പോലീസില് നല്കിയ പരാതിയില് പറയുന്നു. ഇന്നലെ രാത്രി പള്ളൂരിലെ കടയടച്ച ശേഷം കെ.എല്.18.കെ.5657 നമ്പര് സ്വന്തം കാറില് തലശേരി മെയ്ന് റോഡിലെ സഹോദരന്റ സ്റ്റാര് ജ്വല്ലറിയിലെത്തിയതായിരുന്നു. പിന്നീട് പഴയ സ്വര്ണ്ണം വാങ്ങുന്ന സേട്ടുവിന്റെ സ്ഥാപനത്തിലേക്ക് പോയി. അവിടെ നിന്നും ഉരുക്കിയ സ്വര്ണ്ണം വാങ്ങി ബാഗില് സൂക്ഷിച്ച് തിരികെ കാറില് കയറുന്നതിനിടയില് രണ്ട് ബൈക്കുകളിലായി അപരിചിതരെത്തി. ഇവരില് രണ്ട് പേര് പൊടുന്നനെ പ്രദീപിനെ പിന്നില് നിന്നും പിടിച്ചു തള്ളി . ഈ സമയം മുളക് പൊടിയും മുഖത്ത് വീണതോടെ താന് നിസ്സഹായനായി. ഇതിനിടയിലാണ് കൈയ്യിലിരുന്ന ബാഗ് സംഘം തട്ടിയെടുത്തത്. ഞൊടിയിടയില് ലോഗന്സ് റോഡ് ഭാഗത്തേക്കാണ് ബൈക്കുകള് പോയതത്.
മൂന്ന് വര്ഷം മുന്പ് ഇതേ സ്ഥലത്തുള്ള സവിതാ ജ്വല്ലറിക്കുള്ളില് ദുരൂഹ സാഹചര്യത്തില് കൊല്ലപ്പെട്ട ചക്യത്ത് മുക്ക് സ്നേഹയില് പി.കെ.ദിനേശന്റെ പിതൃസഹോദരപുത്രനാണ് പ്രദീപ്. ദിനേശന് കൊലക്കേസിപ്പോള് സി.ബി.ഐ.അന്വേഷണത്തിലാണുള്ളത്. ദിനേശന് കുത്തേറ്റ് മരിച്ച ജ്വല്ലറിക്കടുത്തു വച്ചാണ് ബന്ധുവായ യുവാവ് കൊള്ളയ്കിരയായത്. വിവരം ലഭിച്ച ഉടനെ തലശ്ശേരി പോലീസ് ഇന്സ്പക്ടര് കെ.ഇ.പ്രേമചന്ദ്രന് സ്ഥലത്തെത്തി പ്രാഥമിക അന്വേ ഷ ണം നടത്തി.
ആഭരണ വ്യാപാരി കൊള്ളയടിക്കപ്പെട്ട സ്ഥലത്തിനടുത്തും പരിസരത്തുമുള്ള സി.സി.ടി.വി.ക്യാമറകള് പരിശോധിച്ചു വരികയാണ്. എന്നാല് ഇവയില് മിക്കതും പ്രവര്ത്തിക്കാത്തവയായതിനാല് പോലീസിന് ഉപയോഗപ്പെടുത്താനായിട്ടില്ല.
