റാന്നി: ഡീസലിന്റെയും പെട്രോളിന്റെയും വിലവര്ധനവില് പ്രതിഷേധിച്ച് പണിമുടക്ക് നടത്തുന്നവര് ഇവയെ ജിഎസ്ടിയുടെ പരിധിയില് കൊണ്ടുവരാന് ആവശ്യപ്പെടണമെന്ന് ബിജെപി സംസ്ഥാന അധ്യക്ഷന് കുമ്മനം രാജശേഖരന്. വികാസ് യാത്രയുടെ രണ്ടാം ദിവസമായ ഇന്നലെ റാന്നിയില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം. കേരള സര്ക്കാര് ഇടാക്കിക്കൊണ്ടിരിക്കുന്ന നികുതിയില് ഇളവ് വരുത്തണം, മറ്റ് സംസ്ഥാനങ്ങള് അത് ചെയ്ത് കഴിഞ്ഞു.
ജിഎസ്ടി ഏര്പ്പെടുത്താന് നടപടി സ്വീകരിക്കണം. അടുത്ത ജിഎസ്ടി കൗണ്സിലില് കേരളം അത് ആവശ്യപ്പെടാന് തയ്യാറാകണം. കുമ്മനം ആവശ്യപ്പെട്ടു.
ജലക്ഷാമം രൂക്ഷമാകുന്ന കേരളത്തില് യാതൊരു നിയന്ത്രണവുമില്ലാതെ കുഴല്കിണറുകള് കുഴിക്കാമെന്ന കേരള സര്ക്കാര് നിലപാട് അപായകരമാണെന്ന് കുമ്മനം പറഞ്ഞു. ഇത് കേരളത്തിന്റെ ഭൂഗര്ഭ ജലവിതാനം താഴാനിടയാക്കും. കേരളം അതിഭീകരമായ കുടിവെള്ള ക്ഷാമത്തിന്റെ പിടിയിലാകും.
പട്ടയം കിട്ടിയ മലയോരപ്രദേശത്തെ ഭൂമി, വീടുവെയ്ക്കാനും കൃഷിചെയ്യാനും മാത്രമെ ഇതുവരെ അനുവാദം ഉണ്ടായിരുന്നുള്ളൂ. മറ്റ് ആവശ്യങ്ങള്ക്കും പട്ടയഭൂമി ഉപയോഗിക്കാം എന്ന് പുതിയ നിയമം വരാന്പോവുകയാണ്. അതുകൂടിയായാല് ഈപ്രദേശങ്ങളിലെല്ലാം ഖനനം നടക്കും. പട്ടയം കിട്ടിയ ഭൂമിയില് ഇപ്പോള് ഖനനം നടത്താനാവില്ല. ഈ നിയമം വരുന്നതോടെ പശ്ചിമഘട്ടം മുഴുവന് നഷ്ടപ്പെടാനിടയാകും, കുമ്മനം പറഞ്ഞു.
