തിരുവനന്തപുരം: ഓഖി ദുരന്തമുണ്ടായി ഒരു മാസം പിന്നിടുമ്പോള് ഇനിയും മടങ്ങിയെത്താനുള്ളത് 142 പേരെന്ന് സര്ക്കാര്. മരണം സ്ഥിരീകരിച്ച 25 പേരുടെ ആശ്രിതര്ക്ക് 20 ലക്ഷം രൂപ വീതം അനുവദിച്ച് കഴിഞ്ഞു. അതേസമയം കാണാതായവര്ക്കു വേണ്ടിയുള്ള അനിശ്ചിതമായ കാത്തിരിപ്പ് തുടരുകയാണ്.
ചെറുവള്ളത്തില് പോയ 95 പേരും ബോട്ടില് പോയ 47 പേരും മടങ്ങിയെത്താനുണ്ടെന്നാണ് സര്ക്കാര് കണക്ക്. മരണം സ്ഥിരീകരിച്ച 25 പേരുടെ കുടുംബങ്ങള്ക്കാണ് 20 ലക്ഷം രൂപ വീതം അനുവദിച്ചിട്ടുള്ളത്. ബാക്കി നടപടി ക്രമങ്ങള് പൂര്ത്തിയാകും വരെ കാണാതായവരുടെ കുടുംബങ്ങള്ക്കെല്ലാം പതിനായിരം രൂപ വീതം മുഖ്യമന്ത്രിയുടെ ദുരിതാശ്വാസ നിധിയില് നിന്ന് നല്കും.
കട്ടമരം മുതല് വലിയ ഫിഷിംഗ് ബോട്ടുകള് വരെ തൊഴിലുപകരണങ്ങള് നഷ്ടപ്പെട്ട 100 ഓളം പേര്ക്കുള്ള ധനസഹായ വിതരണം പ്രതിസന്ധിയിലാണ്. തത്തുല്യതുക നഷ്ടപരിഹാരം നല്കുമെന്ന മുഖ്യമന്ത്രിയുടെ പ്രഖ്യാപനമുണ്ടെങ്കിലും നഷ്ടപ്പെട്ട തൊഴിലുപകരണങ്ങളുടെ എണ്ണവും മൂല്യവും കണക്കാക്കുന്നതില് അവ്യക്തതയുണ്ട്. മാത്രമല്ല പലരും പണിക്ക് പോകാന് പോലും കഴിയാത്ത അവസ്ഥയിലുമാണ്.
