കൊച്ചി: ഐഎസ്ആര്ഒ ചാരക്കേസിലെ വെളിപ്പെടുത്തലുമായി ബന്ധപ്പെട്ട വിവാദത്തില് നിന്ന് കരകയാറാന് പുതിയ തന്ത്രവുമായി കെപിസിസി അദ്ധ്യക്ഷന് എം.എം. ഹസ്സന്. മുന്മുഖ്യമന്ത്രിമാരായ എ.കെ. ആന്റണിയും ഉമ്മന്ചാണ്ടിയും തനിക്ക് ഒരുപോലെയാണെന്നും തന്റെ പരാമര്ശം തെറ്റായി വ്യാഖ്യാനിച്ചാണ് വിവാദമുണ്ടാക്കിയതെന്നുമാണ് ഹസ്സന്റെ വെളിപ്പെടുത്തല്. തന്റെ ഫെയ്സ്ബുക്ക് പേജില് വീഡിയോ പോസ്റ്റ് ചെയ്താണ് വിവാദത്തില് നിന്ന് തടിയൂരാനുള്ള ഹസ്സന്റെ ശ്രമം.
ചാരക്കേസുമായി ബന്ധപ്പെട്ട് കെ. കരുണാകരനെ മുഖ്യമന്ത്രി സ്ഥാനത്ത് നിന്ന് നീക്കാന് മുന്നില് നിന്ന് പ്രവര്ത്തിച്ചതില് ഖേദമുണ്ടെന്നായിരുന്നു കോഴിക്കോട് നടന്ന കെ. കരുണാകരന് അനുസ്മരണത്തില് ഹസ്സന് പറഞ്ഞത്. മുഖ്യമന്ത്രി സ്ഥാനത്തുനിന്ന് കരുണാകരനെ നീക്കാനുള്ള ശ്രമത്തെ എ.കെ. ആന്റണി തടഞ്ഞിരുന്നെന്നും ഇക്കാര്യം പറഞ്ഞ് ആന്റണി തന്നെയും ഉമ്മന്ചാണ്ടിയേയും നേരിട്ടു വിളിച്ചിരുന്നെന്നുമാണ് ഹസ്സന് പറഞ്ഞത്.
കരുണാകരന്റെ രാജിയിലേക്ക് നയിച്ചത് ആന്റണിയല്ലെന്നും ഹസ്സന് വ്യക്തമാക്കിയിരുന്ന. ഇത് ഉമ്മന്ചാണ്ടിക്കുനേരെയുള്ള ഒളിയമ്പാണെന്നും കെപിസിസി അദ്ധ്യക്ഷ സ്ഥാനം നിലനിര്ത്താനുള്ള തന്ത്രമായിരുന്നു ഈ വെളിപ്പെടുത്തലിന് പിന്നിലെന്നും കോണ്ഗ്രസ്സിലുള്ളവര് തന്നെ ആരോപണമുന്നയിച്ചിരുന്നു.
ഹസ്സന്റെ പരാമര്ശത്തെ തുടര്ന്ന് ചാരക്കേസിലെ ഗൂഢാലോചനയെക്കുറിച്ച് അന്വേഷിക്കണമെന്ന ആവശ്യവും ശക്തമായിരുന്നു. ഇത് കോണ്ഗ്രസ്സിനെ കൂടുതല് സമ്മര്ദ്ദത്തിലേക്ക് തള്ളിവിട്ടതോടെയാണ് ഹസ്സന് ഫെയ്സ്ബുക്ക് പേജിലൂടെ രംഗത്ത് വന്നത്. അമ്മയെയാണോ അച്ഛനെയാണോ കൂടുതല് ഇഷ്ടമെന്ന് മകനോട് ചോദിച്ചാല്, രണ്ടുപേരെയുമെന്നേ ഉത്തരം പറയാനുള്ളൂ. ഇതുപോലെ തന്നെയാണ് ആന്റണിയോടും ഉമ്മന്ചാണ്ടിയോടും തനിക്കുള്ള സ്നേഹം. കരുണാകരന് അനുസ്മരണത്തില് പറഞ്ഞ കാര്യങ്ങള് ഉമ്മന്ചാണ്ടിയെ നേരില് കണ്ടും വിശദീകരിച്ചെന്നും ഹസ്സന് വീഡിയോയില് പറയുന്നു. ഹസ്സന്റെ വീഡിയോ കോണ്ഗ്രസ്സുകാര് വിശ്വാസത്തിലെടുക്കുമോയെന്നേ ഇനി അറിയേണ്ടൂ.
