മനുഷ്യന് കണ്ടുപിടിത്തങ്ങളുടെ മഹാരാജാവാണ് എന്നു പറയാറുണ്ട്. സ്വന്തം ചിന്തയിലൂടെ അവതരിക്കപ്പെടുന്നവ ഒടുവില് മനുഷ്യന് ചെയ്യാന് കഴിയാത്തതുപോലും ചെയ്യുന്ന സ്ഥിതിയിലെത്താറുണ്ട്. എന്നും വിസ്മയങ്ങളുടെ ശാന്തസമുദ്രമാണ് മനുഷ്യ മസ്തിഷ്കം. അതിന്റെ ഏറ്റവും ഒടുവിലത്തെ ഉദാഹരണമാണ് കഴിഞ്ഞ ദിവസം അമേരിക്കയിലെ മിഷിഗണ് സര്വകവകലാശാലയില് നിന്ന് പുറത്തുവന്ന വിവരം. അവിടത്തെ ഗവേഷകര് കണ്ടുപിടിച്ചത് ഒരു പക്ഷേ ഇന്നത്തെ സകല സാധ്യതകളെയും നവീകരിക്കുന്നതും അട്ടിമറിക്കുന്നതുമായ സംഗതിയായിരിക്കും.
പുതിയ തരത്തിലുള്ള ‘ന്യൂറല് നെറ്റ് വര്ക്ക് ചിപ്പ്’ ആണ് അവര് ഗവേഷണത്തിലൂടെ വികസിപ്പിച്ചിരിക്കുന്നത്. അതനുസരിച്ച് മനുഷ്യ മസ്തിഷ്കം പ്രവര്ത്തിക്കുന്നതുപോലെ ഈ ചിപ്പിന് പ്രവര്ത്തിക്കാനാവും. ഒന്നുകൂടി വ്യക്തമായിപ്പറഞ്ഞാല്, സാധാരണ മനുഷ്യരെപ്പോലെ സ്വയം ചിന്തിക്കാനും പ്രവര്ത്തിക്കാനും ഈ ചിപ്പ് ഘടിപ്പിക്കുന്ന യന്ത്രങ്ങള്ക്കാവും. പ്രധാനമായും പഠിപ്പിക്കാന് ഉപയോഗിക്കുന്ന യന്ത്രങ്ങള്ക്കാണ് ഈ ചിപ്പുകൊണ്ട് പ്രയോജനം ഉണ്ടാവുക. ‘റിസര്വോയര് കംപ്യൂട്ടിങ് സിസ്റ്റം’ എന്ന നെറ്റ് വര്ക്കില് ഈ ചിപ്പുണ്ടെങ്കില് സംസാരിക്കാന് പോവുന്നതിനു മുന്പുതന്നെ അതിന്റെ അര്ത്ഥം സ്വയം ഗ്രഹിക്കാനാവും. അങ്ങനെ വരുമ്പോള് തെറ്റ് വരാനുള്ള സാദ്ധ്യത തീരെ കുറയുമെന്നര്ത്ഥം. ഇന്നത്തെ വിദ്യാഭ്യാസ സംബന്ധമായ പരിശീലനത്തിന്റെ കാലയളവില് വന് കുറവ് വരുത്താനാവുമെന്നാണ് ഗവേഷകര് പ്രതീക്ഷിക്കുന്നത്.
മനുഷ്യന്റെ സ്വാഭാവിക വികാരങ്ങള് യന്ത്രങ്ങള്ക്ക് കൈവന്നാല് എന്ത് സംഭവിക്കുമെന്നതിനെക്കുറിച്ച് ഗവേഷകര് കൂടുതലൊന്നും പറയുന്നില്ലെങ്കിലും ആശങ്കയ്ക്ക് അവകാശമില്ലെന്ന് പറഞ്ഞുകൂടാ. സാധാരണ മനുഷ്യരുടെ വികാരവിചാരങ്ങള് സ്ഫോടനാത്മകമായ സ്ഥിതിവിശേഷത്തിലെത്തിയിരിക്കുന്ന ആധുനിക യുഗത്തില് അതൊക്കെ യന്ത്രങ്ങള്ക്കും കൈവന്നാലത്തെ സ്ഥിതിയെന്താവും? എല്ലാ രംഗത്തും മേല്ക്കൈ നേടാനുള്ള മനുഷ്യന്റെ ശ്രമങ്ങള് വിജയിക്കുംതോറും ലോകത്തുനിന്ന് മാനവികത പതിയെപ്പതിയെ നിഷ്ക്രമിക്കുന്ന അനുഭവമാണുള്ളത്. സംഘര്ഷപൂര്ണമായ ഒരു ലോകത്താണ് ഇന്ന് മനുഷ്യരാശിയുള്ളത്. പുരോഗതിയെന്നു പറയുന്നത് കുറച്ചുപേര്ക്ക് മാത്രം മതിയെന്ന തരത്തിലുള്ള വ്യാഖ്യാനങ്ങള് വരുന്നുണ്ട്. അത്തരത്തിലുള്ള ഒരു അവസ്ഥാവിശേഷത്തിലേക്ക് പുതിയ കണ്ടുപിടിത്തങ്ങള് കൂടിയെത്തുമ്പോള് അതിന്റെ അനന്തര ഫലത്തെക്കുറിച്ച് ഒന്നും പറയാനാവില്ല.
മാനവികതയില് നിന്ന് യാന്ത്രികതയിലേക്കാവുമോ പുതിയ തലമുറ ചരിക്കുകയെന്ന സംശയം അസ്ഥാനത്തല്ല. ശാസ്ത്രം വിജയിക്കുംതോറും മനുഷ്യത്വം പരാജയപ്പെടുന്ന സ്ഥിതി പാടില്ല. മനുഷ്യത്വത്തിന്റെ വിശാലസ്ഥലികളില് നിറവെട്ടമായി ശാസ്ത്രം നില്ക്കുകയും, മനുഷ്യന് അത് കരുത്താവുകയും ചെയ്യുമ്പോഴാണ് സമൂഹത്തിന് പ്രയോജനം ചെയ്യുക. മറിച്ച് മനഷ്യനെ ജയിക്കുന്ന തരത്തില് ശാസ്ത്രം മുന്നേറിയാല് അതിന്റെ ഫലം എന്തെന്ന് ചിന്തിക്കാന് പോലും കഴിയില്ല. അങ്ങനെയൊരു അപകടം സംഭവിക്കാതിരിക്കാന് ഗവേഷകര് ജാഗരൂകരാവുമെന്ന് പ്രതീക്ഷിക്കാം.
