കാഞ്ഞാര്: കാഞ്ഞാറില് നിന്ന് കൂവപ്പള്ളി വഴി ഇലവീഴാപൂഞ്ചിറയ്ക്കുള്ള റോഡ് പണി ഇഴയുന്നു. ഇത് മൂലം പൂഞ്ചിറ – ചക്കിക്കാവ് നിവാസികളുടെ യാത്രാദുരിതം അനന്തമായി നീളുകയാണ്.
റോഡ് തകര്ന്ന് കിടക്കുന്നതിനാല് ഇവിടെയുള്ളവര് യാത്ര ചെയ്യുവാന് വളരെയേറെ കഷ്ടപെടുന്നു. റോഡ് പണി പൂര്ത്തിയാക്കാത്തതില് പ്രതിഷേധിച്ച് നാട്ടുകാര് റോഡ് ഉപരോധം ഉള്പ്പെടെയുള്ള സമരപരിപാടിയുമായി രംഗത്ത് വന്നിരുന്നു. രണ്ട് മാസം മുമ്പ് ഉണ്ടായ ശക്തമായ മഴയില് പൂഞ്ചിറയിലേക്കുള്ള റോഡ് പൂര്ണ്ണമായും ഒലിച്ച് പോയിരുന്നു. ഇതില് പ്രകോപിതരായ നാട്ടുകാര് സ്ഥലം സന്ദര്ശിക്കാനെത്തിയ അധികൃതരെ തടഞ്ഞുവെച്ചിരുന്നു.
ഉടന് റോഡ് പണി പുനരാരംഭിക്കും എന്ന് അധികൃതര് രേഖാമൂലം എഴുതി കൊടുത്തതിന് ശേഷമാണ് നാട്ടുകാര് പിന്തിരിഞ്ഞത്. വിരലിലെണ്ണാവുന്ന ജോലിക്കാരെ വെച്ച് പണി പുനരാരംഭിച്ചുവെങ്കിലും മന്ദഗതിയിലാണ് ജോലികള് മുന്നോട്ടു പോകുന്നത്. കാഞ്ഞാറില് നിന്ന് പുഞ്ചിറ വഴി കോട്ടയം ജില്ലയിലെ കാഞ്ഞിരംകവലയില് എത്തിചേരുന്ന റോഡാണിത്.
ഈ വഴി പൂര്ത്തിയായാല് ഇലവീഴാപൂഞ്ചിറ ടൂറിസത്തിന് ഏറെ ഗുണകരമാകും. ഇപ്പോള് ഇലവീഴാപൂഞ്ചിറ സന്ദര്ശിക്കാനെത്തുന്നവര് വഴി മോശമായതിനാല് പാതിവഴിയില് നിന്ന് ഇലവീഴാപൂഞ്ചിറ സന്ദര്ശിക്കാതെ തിരികെ പോകുകയാണ്.
ഇവിടെ നിന്ന് പഠനത്തിന് പോകുന്ന വിദ്യാര്ത്ഥികളും ദുരിതപാത താണ്ടി വേണം കാഞ്ഞാറില് എത്തുവാന്. റോഡില് മണ്ണിളക്കി ഇട്ടിരിക്കുന്നതിനാല് വേനല് കാറ്റ് മൂലം പ്രദേശമാകെ പൊടി കൊണ്ട് നിറയുകയാണ്. പ്രതിഷേധം ഉയര്ന്നിട്ടും നാട്ടുകാര്ക്ക് കൊടുത്ത വാക്ക് പാലിക്കാന് അധികൃതര്ക്ക് കഴിഞ്ഞിട്ടില്ല. കരാറുകാരനെ സഹായിക്കുന്ന നിലപാടാണ് അധികൃതര് സ്വീകരിക്കുന്നത്. യാത്രാദുരിതത്തില് വലയുന്ന പൂഞ്ചിറ നിവാസികള് തങ്ങളുടെ ദുരിതത്തിന് എന്ന് അവസാനമാകും എന്ന കാത്തിരിപ്പിലാണ്.
