പാനൂര്: സിപിഎം പ്രവര്ത്തകര്, കൊലക്കേസില് പ്രതിയായ പാര്ട്ടി പ്രവര്ത്തകനെ അക്രമിച്ചു. അരയാക്കൂലിലെ ശരത്തിനെ(32)യാണ് കഴിഞ്ഞദിവസം രാത്രി മനേക്കരയില് വെച്ച് അക്രമിച്ചത്. ഇരുകൈകാലുകളും തല്ലിതകര്ത്ത് സാരമായ പരിക്കുകളോടെ ഇയാളെ കോഴിക്കോട് മെഡിക്കല് കോളേജില് പ്രവേശിപ്പിച്ചു. സിപിഎം ക്രിമിനല് നേതാവ് അരയാക്കൂലിലെ ജന്മീന്റവിട ബിജു, മേക്കുന്നിലെ അഭിലാഷ്, പന്ന്യന്നൂരിലെ സഹ്യന് എന്നിവരുടെ നേതൃത്വത്തിലുളള സംഘമാണ് ശരത്തിനെ അക്രമിച്ചത്.
പാനൂരിലെ ബിജെപി നേതാവായിരുന്ന അഡ്വ.വത്സരാജ കുറുപ്പ് വധത്തിലെ പ്രതിയാണ് ശരത്. നേരത്തെ സിപിഎമ്മില് സജീവമായ ശരത് ജന്മീന്റവിട ബിജുവിന്റെ ക്രിമിനല് സംഘത്തില് അംഗമായിരുന്നു. സാമ്പത്തിക ഇടപാടുമായി തെറ്റിപ്പിരിഞ്ഞശേഷം നിരവധി തവണ ശരതിനെ വധിക്കാന് ബിജു ശ്രമിച്ചിരുന്നു. ശരതിന്റെ കല്ല്യാണം മുടക്കാന് ശ്രമിച്ചതിനെ തുടര്ന്ന് സിപിഎം ഉന്നതനേതൃത്വം ഇടപ്പെട്ട് ബിജുവിനെ താക്കീത് നല്കി പിന്തിരിപ്പിക്കുകയായിരുന്നു. കഴിഞ്ഞദിവസം രാത്രി വീട്ടിലെത്തിയ ബിജുവിന്റെ സുഹൃത്തുക്കള് ശരതിനെ ഓട്ടോയില് മനേക്കര ആളൊഴിഞ്ഞ സ്ഥലത്തെത്തിക്കുകയും അക്രമിക്കുകയുമായിരുന്നു. സംഭവത്തില് പാനൂര് പോലീസ് കേസെടുത്തു.
