ഗുവാഹത്തി: ഐഎസ്എല്ലില് മുംബൈ സിറ്റിക്ക് ജയം. വാശിയേറിയ കളിയില് മറുപടിയില്ലാത്ത രണ്ട് ഗോളുകള്ക്ക് അവര് എവേ മത്സരത്തില് നോര്ത്ത് ഈസ്റ്റ് യുണൈറ്റഡിനെ തകര്ത്തു. രണ്ട് ഗോളുകളും നേടിയത് ഇന്ത്യന് താരം ബല്വന്ത് സിങ്. 34, 68 മിനിറ്റുകളിലായിരുന്നു ബല്വന്തിന്റെ ഇരട്ട പ്രഹരം. ഇതോടെ ഈ സീസണില് ബല്വന്തിന്റെ ഗോള് നേട്ടം നാലായി.
കഴിഞ്ഞ ദിവസം എടികെയോട് സ്വന്തം മണ്ണില് 1-0ന് തോറ്റ മുംബൈ സിറ്റിയുടെ തകര്പ്പന് തിരിച്ചുവരവാണ് നോര്ത്ത് ഈസ്റ്റിനെതിരെ കണ്ടത്. പന്തടക്കത്തില് നേരിയ മുന്തൂക്കം ആതിഥേയര്ക്കായിരുന്നെങ്കിലും കൂടുതല് അവസരങ്ങള് തുറന്നെടുത്തത് മുംബൈ. നോര്ത്ത് ഈസ്റ്റിന് ലഭിച്ച അവസരങ്ങള് മുഴുവന് പുറത്തേക്കടിച്ചുകളയുന്നതില് സ്ട്രൈക്കര്മാര് മത്സരിച്ചതോടെയാണ് ആശ്വാസഗോള് പോലും വിട്ടുനിന്നത്. ഒരിക്കല് പോസ്റ്റും അവര്ക്ക് വിലങ്ങുതടിയായി.
വിജയത്തോടെ മുംബൈ സിറ്റി 7 കളികളില് നിന്ന് 10 പോയിന്റുമായി നാലാം സ്ഥാനത്തേക്കുയര്ന്നു. നോര്ത്ത് ഈസ്റ്റ് ആറ് കളികളില് നിന്ന് നാല് പോയിന്റുമായി ഒമ്പതാമത്.
ഇന്ന് നടക്കുന്ന മത്സരത്തില് ബെംഗളൂരു എഫ്സി ജംഷഡ്പൂര് എഫ്സിയുമായി ഏറ്റുമുട്ടും. രാത്രി എട്ടിന് ബെംഗളൂരുവിലെ ശ്രീകണ്ഠീരവ സ്റ്റേഡിയത്തിലാണ് പോരാട്ടം.
പ്രതികരിക്കാൻ ഇവിടെ എഴുതുക: