കണ്ണൂര്: ബാന്സുരി 2017 സംസ്ഥാന കലോത്സവത്തിന് പരിയാരം മെഡിക്കല് കോളേജില് ഇന്ന് തുടക്കമാവും. 19, 20, 21 തീയ്യതികളിലായി നടക്കുന്ന ബാന്സുരി 2017 ന്റെ ഉദ്ഘാടനം വൈകീട്ട് 4 മണിക്ക് പ്രധാനവേദിയില് മന്ത്രി കെ.കെ.ശൈലജ ഉദ്ഘാടനം ചെയ്യും. ആരോഗ്യ സര്വകലാശാലാ വൈസ്ചാന്സിലര് ഡോ.എം.കെ.സി.നായര്, ടി.വി.രാജേഷ് എംഎല്എ, കണ്ണൂര് ജില്ലാപഞ്ചായത്ത് പ്രസിഡന്റ് കെ.വി.സുമേഷ്, ചലച്ചിത്ര സംവിധായകന് ഡോ.ബിജു തുടങ്ങി വിവിധ മേഖലകളിലെ പ്രമുഖര് ചടങ്ങില് പങ്കെടുക്കും. 27 മത്സരലോഗോകളില് നിന്നും ചിത്രകാരന് പൊന്ന്യം ചന്ദ്രന്, ചലച്ചിത്ര സംവിധായകന് ഷെറി, എഴുത്തുകാരനും അധ്യാപകനുമായ ഡോ.ജിനേഷ് കുമാര് എരമം എന്നിവരടങ്ങിയ വിദഗ്ദജൂറി തെരഞ്ഞെടുത്ത കലോത്സവ ലോഗോയ്ക്കുള്ള പുരസ്ക്കാരം ഉദ്ഘാടനച്ചടങ്ങില് സമ്മാനിക്കും. ആകാശ് സി.കെ.മാച്ചേരിയാണ് ലോഗോ തയ്യാറാക്കിയത്.
മറ്റ് സര്വകലാശാലകളെ അപേക്ഷിച്ച് കേരളാ ആരോഗ്യ സര്വകലാശാലയുടെ പരിധി സംസ്ഥാനമാകെയാണ്. മൂന്ന് സോണല് മത്സരങ്ങളിലെ വിജയികളായ 9 പേരും ഗ്രൂപ്പ് മത്സരാര്ത്ഥികളും അപ്പീല് മുഖാന്തിരം യോഗ്യത നേടിയവരും ഉള്പ്പടെയുള്ള 1200 ലധികം കലാപ്രതിഭകളാണ് പരിയാരത്ത് മികവ് തെളിയിക്കുക. പ്രത്യേകം തയ്യാറാക്കിയ 10 വേദികളിലായാണ് മത്സരങ്ങള് നടക്കുക. 5 വീതം വേദികളിലായാണ് വിവിധ സ്റ്റേജ് ഓഫ്സ്റ്റേജ് മത്സരങ്ങള് അരങ്ങേറുക. 53 സ്റ്റേജ് മത്സരയിനങ്ങളും 26 ഓഫ് സ്റ്റേജ് ഇനങ്ങളുമായി ആകെ 79 ഇനങ്ങളിലാണ് മത്സരം നടക്കുക. സംസ്ഥാനത്തെ മെഡിക്കല്, ഡന്റല്, ആയുര്വേദം, ഹോമിയോ, സിദ്ധ, യുനാനി, നഴ്സിംഗ്, ഫാര്മസി, പാരാമെഡിക്കല് കോളേജുകളില് നിന്നായി സോണല് മത്സരങ്ങളില് മത്സരിച്ച് വിജയിച്ചവരാണ് പരിയാരത്ത് നടക്കുന്ന ഇന്റര്്സോണ് സംസ്ഥാന കലോത്സവത്തില് പങ്കെടുക്കാനെത്തുന്നത്.
കലോത്സവത്തിന്റെ പേരെന്നപോലെ വേദികള്ക്കും സംഗീതവുമായി ബന്ധപ്പെട്ടുള്ള പേരുകളാണ് നിശ്ചയിച്ചിരിക്കുന്നത്. ഇതുപ്രകാരം പ്രധാനവേദിയായ സ്റ്റേജ് 1 മേഘമല്ഹാര് എന്ന പേരിലായിരിക്കും. നീലാംബരി, രാഗമാലിക, ഹംസധ്വനി, മോഹനം എന്നീപേരുകളിലായി യഥാക്രമം 2 മുതല് 5 വരെയുള്ള സ്റ്റേജുകള് അറിയപ്പെടും. മോഹനം വേദിയില് പൊതുകലാപരിപാടികളും അരങ്ങേറും.
കണ്ണൂര് ജില്ലയില് ഇതാദ്യമായാണ് ആരോഗ്യസര്വകലാശാലയുടെ സംസ്ഥാന കലോത്സവം വന്നെത്തുന്നത്. പത്രസമ്മേളനത്തില് സംഘാടകസമിതി ജനറല് കണ്വീനര് മുഹമ്മദ് സിറാജ്, പരിയാരം മെഡിക്കല് കോളേജ് ആശുപത്രി എം.ഡി കെ.രവി, പ്രിന്സിപ്പാള് ഡോ കെ.സുധാകരന്, പ്രോഗ്രാം കമ്മിറ്റി കണ് വീനര് പി.എം.അഖില്, ചെയര്മാന് ഡോ.പി.പി.ബിനീഷ്, മീഡിയാ കമ്മറ്റി കണ്വീനര് അജിത് പാനൂര്, കെ.അശോകന് എന്നിവരും പങ്കെടുത്തു.
