തിരുവനന്തപുരം: കൈതമുക്കിന് സമീപം പാല്ക്കുളങ്ങര ചമ്പക്കട സ്വദേശി വിശാഖിനെ(44) വെട്ടിക്കൊലപ്പെടുത്തിയ കേസില് നാലു പ്രതികളും പൊലീസ് പിടിയിലായി. പുലയനാര് കോട്ട ആശുപത്രിക്ക് സമീപം കുറ്റിക്കാട്ടില് നിന്നാണ് ഇവരെ പിടികൂടിയത്. വഴി തര്ക്കത്തിന്റെ പേരിലാണ് കൊലപാതകമെന്നാണ് പൊലീസ് പറയുന്നത്.
അയല്വാസി ചമ്പക്കട സ്വദേശി പ്രദീപാണ് കേസിലെ മുഖ്യപ്രതി.നാല് മാസം മുമ്പ് പ്രദീപിനെ വെട്ടിപ്പരിക്കേല്പ്പിച്ച കേസിലെ പ്രതിയാണ് വിശാഖ്.ഈ കേസില് ജയില് വാസത്തിന് ശേഷം അടുത്തിടെ ആണ് വിശാഖ് പുറത്തിറങ്ങിയത്.ഈ പകയാണ് കൊലപാതകത്തിന് കാരണം.
ഞായറാഴ്ച ഉച്ചയ്ക്ക് രണ്ടുമണിയോടെ വിശാഖിന്റെ വീടിനു മുന്നിലെ റോഡില് വച്ചായിരുന്നു കൊലപാതകം. കൈക്കും കാലിനും വയറിനും പലതവണ വെട്ടേറ്റ് വീണ വിശാഖിനെ പൊലീസ് എത്തിയാണ് ആശുപത്രിയില് എത്തിച്ചത്.ആംബുലന്സില് ആശുപത്രിയിലേക്ക് എത്തിച്ചപ്പോഴേക്കും വിശാഖ് മരിച്ചിരുന്നു.
ജയിലില് നിന്ന് പുറത്തിറങ്ങിയ ശേഷം മലയിന്കീഴാണ് വിശാഖ് താമസിച്ചിരുന്നത്.ഇയാളുടെ അമ്മയാണ് പാല്കുളങ്ങരയിലെ വീട്ടില് ഉണ്ടായിരുന്നത്. ഞായറാഴ്ച അമ്മയെ കാണാന് എത്തിയപ്പോഴാണ് കൊലപാതകം.
KL 27 ഒ 9286 എന്ന നമ്പറുള്ള കാറില് ആണ് പ്രദീപും മൂന്ന് സുഹൃത്തുക്കളും എത്തിയത്. കൃത്യത്തിന് ശേഷം ഇവര് കാറില് രക്ഷപ്പെട്ടു. ഇവര് സഞ്ചരിച്ച വാഹനം പുലയനാര് കോട്ടയിലെ പാര്ക്കിംഗ് ഗ്രൗണ്ടില് നിന്ന് പൊലീസ് കണ്ടെത്തിയിരുന്നു. തുടര്ന്നുളള തെരച്ചിലിലാണ് പ്രതികള് പിടിയിലായത്.
