കോട്ടയം: എംജി സര്വ്വകലാശാലയിലെ സ്കൂള് ഓഫ് ബിഹേവിയറല് സയന്സില് നടത്തിവരുന്ന എംഎസ്സി ഡിസബിലിറ്റി സ്റ്റഡീസ് ആന്റ് റീഹേബിലിറ്റേഷന് സയന്സ് കോഴ്സിന് റിഹേബിലിറ്റേഷന് കൗണ്സില് ഓഫ് ഇന്ത്യയുടെ അംഗീകാരം ലഭിക്കുന്നതിനായി വിദ്യാര്ത്ഥികള് ഗവര്ണ്ണര് പി. സദാശിവത്തെ സന്ദര്ശിച്ച് നിവേദനം നല്കി.
ഭിന്നശേഷിക്കാരായ വ്യക്തികളുടെ പുനരധിവാസത്തിനായി വിദ്യാര്ത്ഥികളെ സജ്ജരാക്കുന്നതിനാണ് എംജി സര്വ്വകലാശാല കോഴ്സ് ആരംഭിച്ചത്.
സര്ക്കാര് ചെലവില് വര്ഷങ്ങളായി നടത്തിവരുന്ന കോഴ്സിന് കൗണ്സില് അംഗീകാരം ഇല്ലാത്തതിനാല് ഇത് പഠിച്ചിറങ്ങുന്ന വ്യക്തികള്ക്കോ അതിന്റെ ഫലം അനുഭവിക്കേണ്ട ഭിന്നശേഷിക്കാരായവര്ക്കോ യാതൊരു പ്രയോജനവും ഇതില് നിന്ന് ലഭിക്കുന്നില്ല.
ഏറെ ഗൗരവമേറിയ ഈ വിഷയം നിരവധിതവണ എംജി സര്വ്വകലാശാല അധികൃതര്, ആര്സിഐ കൗണ്സില്, വിദ്യാഭ്യാസ മന്ത്രി, മുഖ്യമന്ത്രിയുടെ പേഴ്സണല് സെക്രട്ടറി എന്നിവരെ കണ്ട് നിവേദനം നല്കിയെങ്കിലും പരിഹാരം ഉണ്ടാകാതെ വന്നതോടെയാണ് വിദ്യാര്ത്ഥികള് ഗവര്ണ്ണറെ സമീപിച്ചത്.
വിഷയത്തിന്റെ ഗൗരവം മനസ്സിലാക്കിയ ഗവര്ണ്ണര് വേണ്ട നടപടികള് എടുക്കാമെന്നും വാഗ്ദാനം ചെയ്തിട്ടുള്ളതായി വിദ്യാര്ത്ഥികള് പറഞ്ഞു. പ്രതീക്ഷ കൈവെടിയാതെ നിരന്തരമായ ശ്രമം തുടരുമെന്ന് ചങ്ങനാശ്ശേരി അലന് റ്റി 21 വെല്ഫെയര് ട്രസ്റ്റ് ഡയറക്ടറും വിദ്യാര്ത്ഥിയുമായ റിന്സി ജോസഫും സഹപാഠികളും അറിയിച്ചു.
