പാറശാല എംഎല്എ സി.കെ. ഹരീന്ദ്രന് ഡെപ്യൂട്ടി കളക്ടര് സി.ജെ. വിജയത്തെ അസഭ്യം പറഞ്ഞ് കൈയേറ്റം ചെയ്യാന് ശ്രമിക്കുന്നു
നെയ്യാറ്റിന്കര: വനിതാ ഡെപ്യൂട്ടി കളക്ടര്ക്ക് നടുറോഡില് നൂറുകണക്കിനു ജനങ്ങളുടെ മുന്നില് സിപിഎം എംഎല്എയുടെ അസഭ്യവര്ഷം. സ്ത്രീ സംരക്ഷണം അവകാശപ്പെടുന്ന പാര്ട്ടിയുടെ എംഎല്എ തന്നെ വനിതാ ഉദ്യോഗസ്ഥയെ പരസ്യമായി അവഹേളിച്ചത് വിവാദമായി.
മാരായമുട്ടത്ത് ക്വാറി അപകടത്തില് മരിച്ച സതീഷിന്റെയും ബിനില്കുമാറിന്റെയും മൃതദേഹവുമായി റോഡ് ഉപരോധിക്കുന്ന സ്ഥലത്ത് പ്രതിഷേധക്കാരുമായി സംസാരിക്കാനെത്തിയ ഡെപ്യൂട്ടി കളക്ടര് സി.ജെ. വിജയത്തെയാണ് പാറശാല എംഎല്എ സി.കെ. ഹരീന്ദ്രന് പട്ടാപ്പകല് ജനങ്ങളുടെ മുന്നില് അധിക്ഷേപിച്ചത്. ഒരു സ്ത്രീയെന്ന പരിഗണന പോലും കല്പ്പിക്കാതെയാണ് എംഎല്എ ഡെപ്യൂട്ടി കളക്ടറെ അസഭ്യവര്ഷത്തോടെ കൈയേറ്റം ചെയ്യാനൊരുങ്ങിയത്.
ക്വാറി ഉടമകളില് നിന്ന് ഒരു ലക്ഷം രൂപ വീതം ഉടന് നഷ്ടപരിഹാരം വാങ്ങിനല്കാന് ശ്രമിക്കണമെന്ന് ഡെപ്യൂട്ടി കളക്ടര് പറഞ്ഞതാണ് എംഎല്എയെ പ്രകോപിപ്പിച്ചത്. ”നീ ആരാടീ, നിന്നെ ആരാടീ കൊണ്ടു വന്നത്, നിനക്ക് എന്നെ അറിയില്ല?” എന്നായിരുന്നു തുടക്കം. ഡെപ്യൂട്ടി കളക്ടറെ കൈയേറ്റം ചെയ്യാനെത്തിയ എംഎല്എയെ പോലീസും പാര്ട്ടി അണികളും പിടിച്ചു മാറ്റി. ക്വാറി ഉടമകള്ക്കെതിരെ സംസാരിച്ചതിനാണ് ഡെപ്യൂട്ടി കളക്ടറെ കൈയേറ്റം ചെയ്യാന് ശ്രമിച്ചതെന്ന് നാട്ടുകാര് ആരോപിക്കുന്നു.
യാതൊരു തരത്തിലുള്ള ലൈസന്സ് പോലുമില്ലാതെ ക്വാറി പ്രവര്ത്തിച്ചത് സിപിഎമ്മിന്റെ സ്വാധീനത്തിലാണെന്നും പാര്ട്ടി ഫണ്ടില് മാസം തോറും ലക്ഷങ്ങളാണ് നല്കുന്നതെന്നും ശക്തമായ ആരോപണം ആദ്യം മുതല് തന്നെയുണ്ടായിരുന്നു. എംഎല്എയുടെ ഭാഗത്തു നിന്നുമുണ്ടായ പ്രതികരണത്തോടെ ആരോപണങ്ങള് കൂടുതല് ശക്തിയാര്ജ്ജിച്ചു. എംഎല്എയ്ക്കെതിരെ പ്രതിഷേധം ശക്തമായി.
