പാരീസ്: ഫ്രാൻസിൽ പൊതു ഇടത്തിൽ നിസ്കാരം നടത്തിയ മുസ്ലീങ്ങൾക്കെതിരെ പ്രതിഷേധ പ്രകടനവുമായി ഫ്രഞ്ച് രാഷ്ട്രീയ നേതാക്കളുടെ കൂട്ടായ പ്രതിഷേധം. തലസ്ഥാന നഗരമായ പാരീസിലാണ് പൊതു ഇടത്തിൽ നിസ്കാരവും തുടർന്ന് പ്രതിഷേധവും അരങ്ങേറിയത്.
ഇരുന്നൂറോളം പേർ വരുന്ന മുസ്ലീങ്ങൾ പാരീസിലെ പൊതു ഇടത്തിൽ നിസ്കാരം നടത്തുകയുണ്ടായി. ഇതിനെ വിമർശിച്ച് നൂറോളം ഫ്രഞ്ച് രാഷ്ട്രീയ നേതാക്കൾ എത്തുകയും പ്രതിഷേധപ്രകടനം നടത്തുകയുമാണുണ്ടായത്. പൊതു ഇടത്തിൽ മറ്റുള്ളവർക്ക് ബുദ്ധിമുട്ടുണ്ടാക്കുന്ന തരത്തിലുള്ള നിസ്കാരം ഒരിക്കലും അനുവദീയമല്ല എന്നാണ് പ്രതിഷേധക്കാർ അറിയിച്ചത്.
ഫ്രഞ്ച് പതാക പുതച്ചും ദേശീയ ഗാനമാലപിച്ചുമാണ് രാഷ്ട്രീയ നേതാക്കൾ പ്രതിഷേധ പ്രകടനം നടത്തിയത്. അതേ സമയം തങ്ങൾക്ക് അനുവദിച്ചിരുന്ന ടൗൺ ഹാൾ മറ്റാവശ്യങ്ങൾക്കായി എടുത്തതിനെ തുടർന്നാണ് ഇത്തരത്തിലൊരു നിസ്കാരം നടത്തേണ്ടി വന്നതെന്ന് മുസ്ലീം വിശ്വാസികൾ പറഞ്ഞു. ഫ്രാൻസിൽ അൻപത് ലക്ഷം മുസ്ലീമുകളാണ് വസിക്കുന്നത്.
