മട്ടന്നൂര്: വ്യാജരേഖ ചമച്ച് ലക്ഷക്കണക്കിന് രൂപ വിലവരുന്ന സ്വത്ത് തട്ടിയെടുത്ത സംഭവത്തില് പോലീസ് പിടിയിലായ പ്രതിയെ കസ്റ്റഡിയില് വാങ്ങി കൂടുതല് ചോദ്യം ചെയ്യും. സമാനമായ തട്ടിപ്പുകള് നടത്താന് പദ്ധതിയിടുന്നതിനിടയിലാണ് ഒരാള് കഴിഞ്ഞദിവസം മട്ടന്നൂര് പോലീസിന്റെ പിടിയിലായത്. കാസര്കോട് പാണത്തൂരിലെ മാവുങ്കാല് കുന്നില് വീട്ടില് എം.കെ.മുഹമ്മദ് ഹാരിഫ്(39)ആണ് പിടിയിലായത്. ജ്വല്ലറിക്കവര്ച്ചാക്കേസ് ഉള്പ്പെടെ നിരവധി കേസുകളില് ഇയാള് പ്രതിയാണ്. ഇതിനായി തിങ്കളാഴ്ച പോലീസ് മട്ടന്നൂര് കോടതിയില് അപേക്ഷ നല്കും. കൂട്ടുപ്രതികളെക്കുറിച്ച് പോലീസിന് വ്യക്തമായ സൂചനകള് ലഭിച്ചതായാണ് അറിയുന്നത്. ഇവരും ഉടന് പിടിയിലാകും.
ആളുകളെ വിശ്വസിപ്പിക്കും വിധം കബളിപ്പിച്ചായിരുന്നു ഭൂമി തട്ടിപ്പ് നടത്തിയിരുന്നത്. പ്രതികള്ക്ക് വ്യാജരേഖകള് ചമച്ച് നല്കിയവരെക്കുറിച്ചും പോലീസിന് സൂചനകള് ലഭിച്ചിട്ടുണ്ട്. വ്യാജ ഐഡി കാര്ഡുകള്, ഭൂമി സംബന്ധമായ രേഖകള് എന്നിവയാണ് ഇവര് നിര്മ്മിച്ചിട്ടുള്ളത്. പ്രവാസി വ്യവസായായിയും കണ്ണൂര് കണ്ണപുരം സ്വദേശിയുമായ മോഹനന്റെ ഉടമസ്ഥതയിലുള്ള കീഴല്ലൂര് പഞ്ചായത്തിലെ നാഗവളവില് എളമ്പാറ ക്ഷേത്രത്തിനടുത്തുള്ള റി/സ 81/2 ല്പ്പെട്ട 50 സെന്റ് സ്ഥലമാണ് വ്യാജരേഖചമച്ച് ഇവര് തട്ടിയെടുത്തത്. കണ്ണൂര് വിമാനത്താവള പദ്ധതി പ്രദേശത്തോട് ചേര്ന്നുകിടക്കുന്ന ഈ സ്ഥലത്തിന് ലക്ഷക്കണക്കിന് രൂപ വിലമതിക്കും.
സ്ഥലം ഉടമ മോഹനനാണെന്ന വ്യാജേന ഭൂമിതട്ടിപ്പിലെ സൂത്രധാരനായ കണ്ണൂര് സ്വദേശിയെ പോലീസ് പിടികൂടുന്നതിനായി ശ്രമം നടത്തുന്നുണ്ടെങ്കിലും ഇയാള് ഒളിവിലാണ്. ഇയാള്ക്ക് മറ്റ് സഹായങ്ങള് ചെയ്ത് നല്കിയവരെക്കുറിച്ചും മോഹനന്റെ സ്വത്ത് വിവരങ്ങളുടെ നമ്പറും മറ്റും നല്കിയ ആളെക്കുറിച്ചും പോലീസ് അന്വേഷണം നടത്തിവരികയാണ്. ചില ആധാരമെഴുത്തുകാരും ഇതിന് പിന്നിലുണ്ടെന്ന് സംശയിക്കുന്നു. മട്ടന്നൂര് പ്രിന്സിപ്പല് എസ്ഐയുടെ നേതൃത്വത്തിലാണ് അന്വേഷണം നടക്കുന്നത്.
