മടിക്കേരി: കര്ണാടക സര്ക്കാരിന്റെ നേതൃത്വത്തില് ടിപ്പു ജയന്തി ആഘോഷിക്കുന്നതില് പ്രതിഷേധിച്ച് സംഘപരിവാര് ആഭിമുഖ്യമുള്ള ടിപ്പു ജയന്തി വിരോധ മുന്നണിയുടെ നേതൃത്വത്തില് കുടക് ജില്ലയില് ഇന്ന് ബന്ദ് ആചരിക്കും. സംഘര്ഷസാധ്യത കണക്കിലെടുത്ത് ഇന്ന് കുടകില് ജില്ലാ കലക്ടര് വിന്സന്റ് ഡിസുസ 144 പ്രകാരം നിരോധനാജ്ഞ പ്രഖ്യാപിച്ചു. വന് സുരക്ഷാസംവിധാനങ്ങളാണ് പൊലീസ് ഒരുക്കിയിട്ടുള്ളത്.
2015 മുതലാണ് നവംബര് 10 ന് കര്ണാടകത്തില് സര്ക്കാരിന്റെ നേതൃത്വത്തില് ടിപ്പു ജയന്തി ആഘോഷിക്കുന്നത്. കുടകില് എതിര്പ്പും ആദ്യം മുതല് ഉയര്ന്നു. 2015 ല് കുടകില് ആക്രമം പൊട്ടിപുറപ്പെടുകയും വിഎച്ച്പി നേതാവ് കുട്ടപ്പ മടിക്കേരിയിലെ സംഘര്ഷത്തിലും കുടക് വിദ്യാലയ കോളജിന് സമീപം ഷാഹുല് ഹമീദ് എന്നയാള് വെടിയേറ്റും മരിച്ചിരുന്നു. കഴിഞ്ഞ വര്ഷം കനത്ത സുരക്ഷാക്രമീകരണങ്ങള് ഒരുക്കിയിരുന്നതിനാല് അനിഷ്ട സംഭവങ്ങള് ഉണ്ടായില്ല.
ഈ വര്ഷം ടിപ്പുജയന്തി സര്ക്കാര് നേതൃത്വത്തില് ഇന്ന് 10 ന് മടിക്കേരി, വീരാജ്പേട്ട, സോമവാര്പേട്ട താലൂക്ക് ആസ്ഥാനങ്ങളുല് നടക്കുമെങ്കില് സ്വകാര്യമേഖലയില് നടത്താന് കുടക് ജില്ലയില് സുരക്ഷാ കാരണങ്ങളാല് അനുമതിയില്ല. ഇന്നത്തെ ദിവസം വിഎച്ച്പി നേതാവ് കുട്ടപ്പയുടെ ബലിദാന ദിനമായി മൂന്ന് താലൂക്കുകളിലും പരിപാടി നടത്തുമെന്നാണ് എതിര്വിഭാഗത്തിന്റെ തീരുമാനം.
നിരോധനാജ്ഞ പ്രകാരം അഞ്ചില് കൂടുതല് ആളുകള് കൂടിനില്ക്കാന് പാടില്ല. ഇന്ന് ഒന്പതു മുതല് നാളെ രാവിലെ 11 വരെയാണ് നിരോധനാജ്ഞ. രാവിലെ അറു മുതല് വൈകിട്ട് ആറു വരെയാണ് ബന്ദ്. 1500 പൊലിസുകാരെയാണ് ജില്ലയില് ക്രമസമാധാന പാലനത്തിനായി നിയോഗിച്ചിട്ടുള്ളത്. മദ്യശാലകള് ഇന്നലെ രാത്രി ഒന്പതു മുതല് നിരോധിച്ചു. നാളെ രാവിലെ 11 ന് അറിയിപ്പ് പ്രകാരമെ തുറക്കാവൂ. കണ്ണൂര്, വയനാട്, കാസര്കോട്, ഹാസന്, ദക്ഷിണ കന്നഡ, മൈസൂര് എന്നീ ജില്ലകളില് നിന്ന് കൂടകില് പ്രവേശിക്കുന്ന കേന്ദ്രങ്ങളിലായി 10 ചെക്ക് പോസ്റ്റുകള് തുറക്കുകയും 40 സിസിടിവി കാമറകള് സ്ഥാപിക്കുകയും ചെയ്തിട്ടുണ്ട്. കുടക് ജില്ലയ്ക്കുള്ളില് 60 ചെക്ക് പോസ്റ്റുകളും 249 സിസിടിവി കാമറകളും സ്ഥാപിച്ചിട്ടുണ്ട്. പൊലിസിന്റെ അറുപതും വനംവകുപ്പിന്റെ പതിനാലും പെട്രോളിംങ് സംഘങ്ങള് മുഴുവന് സമയവും റോന്തുചുറ്റും. ദ്രുതകര്മ സേനയുടെ നേതൃത്വത്തില് ഇന്നലെ ജില്ലയിലെ ടൗണുകളില് റൂട്ട് മാര്ച്ച് നടത്തി.
ഒരു പോലീസ് മേധാവി, എട്ട് ഡിവൈഎസ്പിമാര്, ഇരുപത്തിമൂന്ന് സിഐമാര്, അറുപത്തിഎട്ട് എസ്ഐമാര്, നൂറ്റിപതിമൂന്ന് എഎസ്ഐമാര് എന്നിവര് സുരക്ഷാ ക്രമീകരണങ്ങള്ക്ക് നേതൃത്വം നല്കും. സാധാരണ നടത്താറുള്ള മടിക്കേരിയിലെ വെള്ളിയാഴ്ച്ച ചന്ത മാറ്റിവെച്ചു.
