കോട്ടയം: ശാസ്ത്രീയമായി സംഗീതം അഭ്യസിക്കാത്ത സംഗീത പ്രേമികളുടെ കൂട്ടായ്മയായ ശ്രീരാഗം സംഗീതസഭ നവഗായകര്ക്ക് അനുഗ്രഹമാകുന്നു.
വിദ്യാര്ത്ഥികള് മുതല് എന്ഞ്ചിനയര്മാര്വരെ പങ്കാളികളായ ഈ നാട്ടുകൂട്ടം നട്ടാശ്ശേരി കേന്ദ്രമായാണ് പ്രവര്ത്തിക്കുന്നത്. തങ്ങളുടെ ഉള്ളിലൊതുക്കിയ കഴിവുകളെ പുറത്തുകാട്ടാന് അവസരം ലഭിച്ചതിലുള്ള സന്തോഷത്തിലാണ് സംഗീതപ്രേമികള്.
നട്ടാശ്ശേരി 1535-ാം മ്പര് എന്എസ്എസ് കരയോഗം ഹാളില് എല്ലാ ഞായറാഴ്ചകളിലുമാണ് കൂട്ടായ്മ നടക്കുന്നത്. വൈകിട്ട് 6 മുതല് 9.30 വരെ നടക്കുന്ന കൂട്ടായ്മയില് ട്രാക്കിന്റെ സഹായത്തില് ഗായകര് ഓരോരുത്തരും ഗാനങ്ങള് ആലപിക്കും. അപാകതകള് കണ്ടെത്തി പരസ്പരം ചര്ച്ചചെയ്ത് പരിഹരിക്കും. പ്രശസ്ത സംഗീതജ്ഞന് ഡോ. തൃക്കൊടിത്താനം രാധാകൃഷ്ണനും കലാക്ഷേത്ര ബേബി മാത്യുവും മാര്ഗ്ഗനിര്ദ്ദേശം നല്കുന്നുമുണ്ട്. നാല്പ്പതോളം അംഗങ്ങളുള്ള കൂട്ടായ്മ സ്വന്തമായി മൈക്ക് സിസ്റ്റം സമ്പാദിച്ചുകഴിഞ്ഞു.
ചലച്ചിത്ര-ഭക്തിഗാനങ്ങള്ക്ക് മുന്തൂക്കം നല്കുന്ന ഇവര് പൊതുവേദികളില് പരിപാടി അവതരിപ്പിച്ച് തുടങ്ങി. ഓള്ഡ് ഈസ് ഗോള്ഡ് എന്ന പേരില് ചലച്ചിത്ര ഗാനങ്ങളും കൂടാതെ ഭക്തിഗാനമേളയും അവതരിപ്പിക്കുന്നുണ്ട്.
കലാശ്രീ കോട്ടയം കെ. വീരമണിയുടെ ശിഷ്യനും വി.ആര്. അസോസിയേറ്റ്സ് എന്ജിനീയേഴ്സ് ആന്ഡ് വാസ്തു കണ്സള്ട്ടന്റ് ഉടമ റെജി നരായണന്, എന്ജിനീയറായ സുരേഷ് എന്നിവരുടെ നേതൃത്വത്തിലാണ് കൂട്ടായ്മ നടക്കുന്നത്.
ഡോ. കെ.ജെ. യേശുദാസിന്റെ 76-ാം ജന്മദിനാഘോഷം മാങ്ങാനം തേവര്കുന്ന് ശിവക്ഷേത്രത്തില് ശ്രീരാഗം സംഗീതസഭ സംഘടിപ്പിച്ചിരുന്നു. ഒളശ്ശ അന്ധവിദ്യാലയത്തിലെ കുട്ടികള്ക്കായി ഇവര് സംഗീതവിരുന്ന് അവതരിപ്പിക്കാറുണ്ട്.
