അഹമ്മദാബാദ്: ഗുജറാത്തിലെ അക്ഷര്‍ധാം ക്ഷേത്രം ആക്രമിച്ച സംഭവത്തിലെ മുഖ്യപ്രതികളില്‍ ഒരാളായ അജ്മീരി അബ്ദുള്‍ റഷീദ് അറസ്റ്റില്‍. 30 പേരുടെ മരണത്തിനിടയാക്കിയ ആക്രമണം നടന്ന് പതിനഞ്ചു വര്‍ഷത്തിനു ശേഷമാണ് ഇയാള്‍ കുടുങ്ങിയത്.
റിയാദില്‍ നിന്ന് മടങ്ങിവരുമ്പോള്‍ അഹമ്മദാബാദ് വിമാനത്താവളത്തിലായിരുന്നു അറസ്റ്റ്. ഇയാളുടെ സഹോദരന്‍ അജ്മീരി ആദം കേസില്‍ അറസ്റ്റിലായിരുന്നുവെങ്കിലും പിന്നീട് വിട്ടയച്ചു.
2002 സപ്തംബര്‍ 24നാണ് രണ്ടു ഭീകരര്‍ കൈബോംബുകളും ഓട്ടോമാറ്റിക് തോക്കുകളുമായി ഗുജറാത്ത് ഗാന്ധിനഗറിലെ അക്ഷര്‍ധാം ക്ഷേത്രം ആക്രമിച്ചത്. 30 പേര്‍ കൊല്ലപ്പെട്ടു. 80 പേര്‍ക്ക് പരിക്കേറ്റു. ലഷ്‌ക്കര്‍, ജെയ്‌ഷെ മുഹമ്മദ് ഭീകരരായിരുന്നു ആക്രമണം നടത്തിയത്. ആക്രമണം ആസൂത്രണം ചെയ്യുകയും സഹായങ്ങള്‍ നല്‍കുകയും ചെയ്തതിനാണ് അജ്മീരി ആദം അടക്കം ആറു പേരെ അറസ്റ്റു ചെയ്തത്. ഇവരെ 2014ല്‍ സുപ്രീം കോടതി വിട്ടയച്ചു.
