കോട്ടയം: കോട്ടയത്ത് നടക്കുന്ന സംസ്ഥാന ബധിര കായികമേളയോട് സര്ക്കാരിനും തദ്ദേശസ്ഥാപനങ്ങള്ക്കും കടുത്ത അവഗണന. ദേശീയ, അന്തര്ദേശീയ തലങ്ങളില് ശ്രദ്ധേയമായ നേട്ടങ്ങള് കൈവരിച്ചിട്ടുള്ള താരങ്ങള് ഉള്പ്പെടെ വിവിധ ഇനങ്ങളില് 853 മത്സരാര്ത്ഥികള് പങ്കെടുക്കുന്ന മേളയോടാണ് അധികൃതരുടെ അവഗണന.
15 ലക്ഷം രൂപ ചെലവാകുന്ന മേളയ്ക്ക് സര്ക്കാരിന്റെ ധന സഹായം ഒന്നും തന്നെയില്ല.ആകെയുള്ളത് തദ്ദേശ സ്വയംഭരണ സ്ഥാപനങ്ങളില് നിന്നുള്ള ഗ്രാന്റ് മാത്രമാണ്. ഇതും പൂര്ണ്ണമായും ലഭിക്കാറില്ല. പതിനായിരം രൂപയാണ് ഒരു പഞ്ചായത്തില് നിന്ന് ലഭിക്കുന്ന പരമാവധി ഗ്രാന്റ്. എന്നാല് ഈ ഗ്രാന്റ് നല്കുന്നതില് പോലും പല തദ്ദേശ സ്ഥാപനങ്ങളും വിമുഖതകാണിക്കുന്നതായി മേളയുടെ സംഘാടകര് പരാതിപ്പെടുന്നു. പണത്തിന്റെ കുറവുമൂലം ചെലവുചുരുക്കിയാണ് കായിക മേള നടക്കുന്നത്. മത്സാരാര്ത്ഥികളുടെ ഭക്ഷണം, യാത്രപ്പടി, താമസം എന്നിങ്ങനെ വിവിധ ആവശ്യങ്ങള്ക്കായി പണച്ചെലവ് ഏറെയാണ്. കോട്ടയം നഗരത്തിലെ ചില വ്യവസായികളുടെ സഹായത്താലാണ് ശരിക്കും ഈ മേള നടന്നുവരുന്നത്. കായിക മേളയുടെ ഉദ്ഘാടന സമ്മേളനത്തില് എത്തി കുറെ വാഗ്ദാനങ്ങള് നല്കുക മാത്രമാണ് ജനപ്രതിനിധികള് സാധാരണ ചെയ്യുന്നത്.
കായിക മേളയില് മികവുറ്റ പ്രകടനം നടത്തുന്ന കുട്ടികള്ക്ക് ഗ്രേസ് മാര്ക്ക് നല്കുന്ന സമ്പ്രദായം നിലവിലില്ല. മുമ്പ് ഗ്രേസ് മര്ക്ക് നല്കിയിരുന്നു. എന്നാല് 15 വര്ഷമായി ഈ സമ്പ്രദായം എടുത്തുകളഞ്ഞു. ഇത് പുനരാരംഭിക്കണമെന്ന ആവശ്യം ശക്തമാണ്. ഇത് സംബന്ധിച്ച് നിരവധി അപേക്ഷ സമര്പ്പിച്ചെങ്കിലും നടപടികള് ഉണ്ടായിട്ടില്ലെന്ന് സംഘാടകര് പറഞ്ഞു. ഇവരുടെ ജീവിതം നിശബ്ദമാണെങ്കിലും തങ്ങളുടെ കായിക മോഹത്തെ തളച്ചിടാതെ പുതിയ റെക്കോഡുകള് ഭേദിക്കാനുള്ള തീവ്രശ്രമത്തിലാണ് ഈ കായിക പ്രേമികള്.
