ന്യൂദല്ഹി: ഡ്രോണുകളുടെ സിവില് ഉപയോഗങ്ങള് സംബന്ധിച്ച കരട് ചട്ടങ്ങള് കേന്ദ്ര സിവില് വ്യോമയാന ഡയറക്ടറേറ്റ് പ്രഖ്യാപിച്ചു. ഭാരത്തിന്റെ അടിസ്ഥാനത്തില് അവയെ തരം തിരിച്ചിട്ടുമുണ്ട്.
1. നാനോ:250 ഗ്രാമോ അതില് താഴെയോ 2.മൈക്രോ: 250 ഗ്രാമിലധികമോ 2 കിലോയോ അതിന് താഴെയോ 3.മിനി: 2 കിലോയില് കൂടുതലോ 25 കിലോയോ അതില് താഴെയോ 4.ചെറുകിട: 2 കിലോയില് കൂടുതലോ 150 കിലോയോ അതില് താഴെയോ 5.വന്കിട: 150 കിലോഗ്രാമില് അധികം
2. ഡ്രോണുകള് പകല് 200 അടി ഉയരത്തില് കാഴ്ചയുടെ പരിധിക്കുള്ളില് മാത്രമേ പ്രവര്ത്തിപ്പിക്കാവൂ. അവയില് നിന്ന് എന്തെങ്കിലും സാധനങ്ങള് താഴെയ്ക്ക് ഇടരുത്. മനുഷ്യരെയോ, അപകടകരമായ വസ്തുക്കളോ കൊണ്ടുപോകരുത്.
3 ഡ്രോണുകള് വ്യോമയാന ഡയറക്ടറേറ്റ് ജനറലിന് കീഴില് രജിസ്റ്റര് ചെയ്യണം. അവയ്ക്ക് തിരിച്ചറിയല് നമ്പരും, യൂണീക്ക് ഐഡന്റിഫിക്കേഷന് നമ്പറും (യുഐഎന്) ഉണ്ടായിരിക്കും. മിനി വിഭാഗത്തിലും അതിന് മുകളിലുമുള്ള വിഭാഗങ്ങള്ക്കും അണ്മാന്ഡ് എയര് ക്രാഫ്റ്റ് ഓപ്പറേറ്റര് പെര്മിറ്റ് വേണം.
4 വിദ്യാഭ്യാസ സ്ഥാപനങ്ങളുടെ പരിസരങ്ങളില് 200 അടി ഉയരത്തില് പറപ്പിക്കുന്ന രണ്ടര കിലോഗ്രാം വരെ ടേക്ക്ഓഫ് ഭാരമുള്ള മോഡല് എയര് ക്രാഫ്റ്റുകള്ക്ക് തിരിച്ചറിയല് നമ്പരോ, പെര്മിറ്റോ ആവശ്യമില്ല. നാനോ മൈക്രോ വിഭാഗങ്ങളിലൊഴികെയുള്ള ഡ്രോണുകള് പറപ്പിക്കാന് റിമോട്ട് പൈലറ്റ്മാര്ക്ക് പരിശീലനം നിര്ബന്ധമാക്കി. ഡ്രോണുകള്ക്ക് റേഡിയോഫ്രീക്വന്സി ഐഡന്റിഫിക്കേഷന് സംവിധാനം / സിം / കൂട്ടിമുട്ടാതിരിക്കാനുള്ള ആന്റി കൊളീഷന് ലൈറ്റുകള് മുതലായവ ഉണ്ടായിരിക്കണം.
5. ഡ്രോണുകള് നിരോധിത മേഖലകളില് പാടില്ല. വിമാനത്താവളങ്ങള്ക്ക് അഞ്ച് കിലോമീറ്ററിനുള്ളില് ഡ്രോണുകള് പറത്തരുത്.
6. പരിസ്ഥിതി ലോല പ്രദേശങ്ങള്, ദേശീയ പാര്ക്കുകള്, വന്യമൃഗസംരക്ഷണ കേന്ദ്രങ്ങള് എന്നിവിടങ്ങളില് പ്രവര്ത്തിപ്പിക്കാന് മുന്കൂര് അനുമതി വേണം. നാനോ മൈക്രോ ഡ്രോണുകള് അടച്ച് മൂടിയ സ്ഥലങ്ങളില് പോലീസ് അനുമതിയോടെ പറപ്പിക്കാം. സഞ്ചരിക്കുന്ന വാഹനങ്ങള്, കപ്പല്, വിമാനങ്ങള് എന്നിവയില് നിന്ന് ഡ്രോണുകള് പ്രവര്ത്തിപ്പിക്കാന് പാടില്ല.
