ഭുവനേശ്വര്: 28 മാസം പ്രായമുള്ള സയാമീസ് ഇരട്ടകളെ ദല്ഹി ആള് ഇന്ത്യ മെഡിക്കല് ഇന്സ്റ്റിറ്റ്യൂട്ട് ഒഫ് മെഡിക്കല് സയന്സിലെ ഡോക്ടര്മാര് പതിനൊന്നു മണിക്കൂര് നീണ്ട ശസ്ത്രക്രിയയ്ക്കൊടുവില് വിജയകരമായി വേര്പെടുത്തി. ഒറീസയിലെ കാന്ധമല് ജില്ലയിലെ ജാഗ, കാലിയ എന്നീ കുരുന്നുകളെയാണ് ശസ്ത്രക്രിയയ്ക്ക് വിധേയരാക്കിയത്.
തലകള് ഒരുമിച്ച് ചേര്ന്ന നിലയിലായിരുന്നു കുട്ടികള്ക്ക് ആഗസ്റ്റില് രക്തക്കുഴലുകള് വേര്പെടുത്തുന്ന ശസ്ത്രക്രിയ നടത്തിയിരുന്നു. കുട്ടികളുടെ ആരോഗ്യനിലയില് ആശങ്കപ്പെടാനില്ലെന്ന് ഡോക്ടര്മാര് പറഞ്ഞു. ഇപ്പോള് പ്ളാസ്റ്റിക് സര്ജറി വിദഗ്ദ്ധരുടെ പരിചരണത്തിലാണ് കുട്ടികള്. ഇത് നാളെ രാവിലെയോടെ പൂര്ത്തിയാവുമെന്ന് ഡോക്ടര്മാര് പറഞ്ഞു.
ശസ്ത്രക്രിയ വിജയകരമായി പൂര്ത്തിയാക്കിയ ന്യൂറോ സര്ജറി, ന്യൂറോ അനസ്തേഷ്യ, പ്ളാസ്റ്റിക് സര്ജറി വിഭാഗങ്ങളിലെ ഡോക്ടര്മാരെ ഒഡിഷ മുഖ്യമന്ത്രി നവീന് പട്നായിക് അഭിനന്ദിച്ചു. വിദേശത്ത് നിന്നുള്ള വിദഗ്ദ്ധ ഡോക്ടര്മാരുടെ സേവനം ഉപയോഗപ്പെടുത്തേണ്ടി വന്നില്ലെന്നതും ശ്രദ്ധേയമാണ്.
