കോട്ടയം: ഭാരത് ആശുപത്രക്കെതിരെ ഏതാനും നഴ്സുമാര് നടത്തുന്ന സമരത്തില് നിന്ന് നിരുപാധികം പിന്മാറണമെന്ന് ഹിന്ദു ഐക്യവേദി സംസ്ഥാന ജന:സെക്രട്ടറി ഇ.എസ്.ബിജു ആവശ്യപ്പെട്ടു.
കരാര് നിയമപ്രകാരം നിശ്ചയിക്കപ്പെട്ട നഴ്സുമാര് കരാര് കാലാവധിക്കു ശേഷം തുടരണമെന്ന് വാശി പിടിക്കുന്നതും, സമരത്തിലേര്പ്പെടുന്നതും ന്യായവും നീതിയുക്തമല്ലാത്തതിനാലാണ് ഹിന്ദു ഐക്യവേദി ഈ ആവശ്യമുന്നയിക്കുന്നതെന്ന് അദ്ദേഹം പ്രസ്താവനയില് പറഞ്ഞു.
കോട്ടയത്ത് സ്തുത്യര്ഹമായ സേവനം നടത്തുന്ന ഭാരത് ആശുപത്രിയ്ക്കെതിരെ അടിസ്ഥാനമില്ലാത്ത ആരോപണങ്ങള് ഉന്നയിക്കുന്നത് സമരത്തിന് നേതൃത്വം കൊടുക്കുന്ന സംഘടനയ്ക്ക് ഭൂക്ഷണമല്ല. സംസ്ഥാനത്തെ ഭൂരിഭാഗം ഹോസ്പിറ്റലുകളിലും കരാര് വ്യവസ്ഥയിലാണ് നഴ്സുമാരെ ആതുര സേവനത്തിന് നിയമിക്കുന്നത്. ഭാരത് ആശുപത്രിയില് കരാര് നഴ്സുമാരെ സ്ഥിര ജീവനക്കാരായി നിയമിക്കണമെന്ന ആവശ്യവും അടിസ്ഥാനമില്ലാത്തതാണെന്ന് ഇ.എസ്.ബിജു പറഞ്ഞു. മാതൃകാപരമായി പ്രവര്ത്തിക്കുന്ന ഭാരത് ആശുപത്രിയ്ക്കും, ജോലി ചെയ്യുന്ന നഴ്സുമാര് അടക്കമുള്ള ജീവനക്കാര്ക്കും എല്ലാവിധ പിന്തുണയും നല്കുമെന്നും അദ്ദേഹം കൂട്ടിച്ചേര്ത്തു.
സമരം അനാവശ്യം: ഐഎംഎ
കോട്ടയം: ഭാരത് ആശുപത്രിക്കെതിരെ ഏതാനും നഴ്സുമാര് നടത്തിവരുന്ന സമരം അനാവശ്യമാണെന്ന് ഇന്ത്യന് മെഡിക്കല് അസോസിയേഷന്(ഐഎംഎ) അഭിപ്രായപ്പെട്ടു. ഭാരത് ആശുപത്രിക്കെതിരെ നടക്കുന്ന സമരത്തെക്കുറിച്ച് ഐഎംഎ നിയോഗിച്ച സമിതി സമര്പ്പിച്ച റിപ്പോര്ട്ട് പരിഗണിച്ച ശേഷമാണ് ജില്ലാ ഘടകം സമരത്തോടുള്ള നിലപാട് പ്രഖ്യാപിച്ചത്. ഇപ്പോഴത്തെ സമരത്തിന് ന്യായീകരണമില്ലെന്നും ആരോപണങ്ങള് അടിസ്ഥാനരഹിതമാണെന്നും ഐഎംഎ കോട്ടയം ബ്രാഞ്ച് പ്രസിഡണ്ട് ഡോ. സി.എന്. രാമചന്ദ്രന് നായര്, സെക്രട്ടറി ഡോ. ഏലിയാസ് ജോസഫ് എന്നിവര് പ്രസ്താവനയില് അറിയിച്ചു. ആശുപത്രിക്കും നിലവില് ജോലിയിലുള്ള ജീവനക്കാര്ക്കും ഐഎംഎ പിന്തുണ പ്രഖ്യാപിച്ചു.
