കാറുകള്‍ക്ക് ദീപാവലി ഉത്സവം

പുതിയ വാഹനങ്ങള്‍ വാങ്ങാനും പഴയത് മാറ്റി വാങ്ങാനും എപ്പോഴും നല്ലത് ഉത്സവകാലമാണ്. വിലക്കുറവും എക്‌സ്‌ചേഞ്ച് ബോണസുമൊക്കെയായി ശരിക്കും ഉപഭോക്താവിന് ലോട്ടറിയാണ് ഉത്സവ സീസണ്‍. ദീപാവലിക്കും വന്‍ ഓഫറുകളുമായി കമ്പനികള്‍ ആളുകളുടെ ഇടയിലേക്ക് വണ്ടി ഓടിക്കുകയാണ്.

രാജ്യത്തെ കാര്‍ വില്‍പ്പനയില്‍ മുന്‍പന്തിയിലുള്ള മാരുതി സുസുക്കിയാണ് വന്‍ ഇളവുകള്‍ പ്രഖ്യാപിച്ചിട്ടുള്ളത്. ഓള്‍ട്ടോ 800 മോഡലിന് 20,000 രൂപയും ഓള്‍ട്ടോ കെ10 ന് 10,000 രൂപയുമാണ് ക്യാഷ് ഡിസ്‌കൗണ്ട്. കൂടാതെ, 20,000 രൂപയുടെ എക്‌സ്‌ചേഞ്ച് ബോണസുമുണ്ട്. എഎംടി മോഡലുകള്‍ക്ക് 15,000 രൂപയാണ് ക്യാഷ്ഡിസ്‌കൗണ്ട്. 20,000 രൂപവരെ എക്‌സ്‌ചേഞ്ച് ബോണസും നല്‍കും.

സെലേറിയോ, സ്വിഫ്റ്റ് എന്നീ മോഡലുകള്‍ക്ക് ഡീലര്‍മാര്‍ 20,000 മുതല്‍ 22,000 രൂപവരെ ക്യാഷ് ഡിസ്‌കൗണ്ട് നല്‍കും. 15,000 രൂപയുടെ എക്‌സ്‌ചേഞ്ച് ബോണസും ലഭിക്കും. എര്‍ട്ടിഗയുടെ സിഎന്‍ജി വേരിയന്റിന് 9000 രൂപയാണ് ക്യാഷ് ഡിസ്‌കൗണ്ട്. ഡീസല്‍ വേരിയന്റിന് 12,000 രൂപയാണ് ഇളവ്. 20,000 രൂപ മുതല്‍ 45,000 രൂപവരെ എക്‌സ്‌ചേഞ്ച് ബോണസും ഈ മോഡലുകള്‍ക്ക് ലഭിക്കും. സിയസ് ഡീസല്‍ മോഡല്‍ വാങ്ങിയാല്‍ 40,000 രൂപയുടെ നേട്ടമാണ് ഉപഭോക്താവിന് ഉണ്ടാവുക. എക്‌സ്‌ചേഞ്ച് ബോണസ് അരലക്ഷവും ലഭിക്കും.

ഹോണ്ട കാര്‍ ഇന്ത്യ ദി ഗ്രെയ്റ്റ് ഹോണ്ട ഫെസ്റ്റ് എന്ന പേരിലാണ് ദീപാവലി ഓഫര്‍ നല്‍കുന്നത്. ബ്രിയോ കാറുകള്‍ 21,200 രൂപവരെയാണ് ഇളവ്. ബിആര്‍വിക്ക് ഒരുലക്ഷം രൂപവരെ ക്യാഷ് ഡിസ്‌കൗണ്ട് കിട്ടും. ഹോണ്ട ജാസ് വാങ്ങിയാല്‍ ദീപാവലി നേട്ടമായി 42,000 രൂപ ലാഭിക്കാം. ഒരു വര്‍ഷത്തേക്കുള്ള സൗജന്യ ഇന്‍ഷുറന്‍സും 15,000 രൂപയുടെ ഇളവും ഉള്‍പ്പെടെയാണിത്. അമേസിന് അരലക്ഷം രൂപവരെയാണ് ഓഫര്‍. ആദ്യവര്‍ഷത്തെ ഇന്‍ഷുറന്‍സും 26,000 രൂപയുടെ ആക്‌സസറീസും ഉള്‍പ്പെട്ടതാണ് ഓഫര്‍.

ഫോക്‌സ് വാഗണും വന്‍ ഓഫറുമായി രംഗത്തുണ്ട്. പോളോ, അമിയോ, വെന്റോ എന്നീ മോഡലുകള്‍ക്കാണ് ഇളവ്. പോളോ കംഫര്‍ട്ട്‌ലൈന്‍ പെട്രോള്‍,ഡീസല്‍ മോഡലുകള്‍ക്ക് 25,000 രൂപവരെയാണ് ഇളവ്. പോളോ ഹൈലൈന്‍ വേരിയന്റിന് 50,000 രൂപവരെയും ഇളവുണ്ട്. അമിയോയ്‌ക്ക് അരലക്ഷവും വെന്റോ ഡീസല്‍ ഹൈലൈന്‍ ഡിജിഎസ് ഓട്ടോമാറ്റിക്കിന് 90,000 രൂപവരെയും ഇളവ് കിട്ടും. വെന്റോ പെട്രോള്‍ ഹൈലൈന്‍ ഡിജിഎസ് ഓട്ടോമാറ്റിക്കിന് 60,000 രൂപയാണ് ഇളവ്. കൂടാതെ എല്ലാ മോഡലുകള്‍ക്കും 20,000 എക്‌സ്‌ചേഞ്ച് ബോണസും 20,000 ലോയല്‍റ്റി ബോണസും കിട്ടും.

പുതിയ മോഡലുകളെ ഒഴിവാക്കിയാണ് ടാറ്റ ഓഫറുകള്‍ നല്‍കുന്നത്. നാനോ വാങ്ങുന്നവര്‍ക്ക് 15,000 രൂപയുടെ നേട്ടമുണ്ട്. 10,000 രൂപയാണ് എക്‌സ്‌ചേഞ്ച് ബോണസ്. ബോള്‍ട്ട്, സെസ്റ്റ് എന്നിവയ്‌ക്ക് 15,000 രൂപയാണ് എക്‌സ്‌ചേഞ്ച് ബോണസ്.ബോള്‍ട്ടിന് 25,000 രൂപയും സെസ്റ്റിന് 20,000 രൂപയും ഇളവുണ്ട്. ടിയാഗോ, ടിഗാര്‍, ഹെക്‌സ, നെക്‌സോണ്‍ എന്നിവയ്‌ക്ക് ഓഫറുകള്‍ പ്രഖ്യാപിച്ചിട്ടില്ല.

നിസാനും ഡാറ്റ്‌സണ്‍ ഇന്ത്യയും വന്‍ ഓഫറുമായി ബിഗ്ഗെസ്റ്റ് ദീപാവലി കാര്‍ണിവല്‍ ഒരുക്കിയിരുന്നു. ഒക്ടോബര്‍ ഏഴുമുതല്‍ 10വരെയുള്ള ദിവസങ്ങളില്‍ കാര്‍ ബുക്ക് ചെയ്തവര്‍ക്ക് സൗജന്യ ഇന്‍ഷുറന്‍സ് ഉള്‍പ്പെടെ വന്‍ ഇളവാണ് നല്‍കിയത്.