ജിഹാദി ചുവപ്പ് ഭീകരതയുടെ യഥാര്ത്ഥ മുഖം തുറന്നുകാട്ടി ഗുരുവായൂര് നാടകപ്പുര അവതരിപ്പിക്കുന്ന ‘കടക്കൂ പുറത്ത്’ എന്ന നാടകം ജനശ്രദ്ധയാകര്ഷിക്കുന്നു. ഇന്നു സമൂഹം നേരിടുന്ന പ്രധാനവെല്ലുവിളിയായ ലൗ ജിഹാദും, കൊലപാതക രാഷ്ട്രീയവും, ഇടതുസര്ക്കാരിന്റെ ദുര്ഭരണവും നാടകത്തിന്റെ ഇതിവൃത്തമാണ്. ലൗജിഹാദിനെതിരെയുള്ള മുന്നറിയിപ്പും സിപിഎം അക്രമരാഷ്ട്രീയവും പലരുടെയും കണ്ണുകളെ ഈറനണിയിച്ചു.
നാടകത്തിനൊടുവില് തങ്ങളുടെ ആശങ്ക പങ്കുവയ്ക്കാനും കാഴ്ച്ചക്കാര് മറന്നില്ല.
ജിഹാദി-ചുവപ്പ് ഭീകരതയ്ക്കെതിരെ ബിജെപി സംസ്ഥാന അധ്യക്ഷന് കുമ്മനം രാജശേഖരന് നയിക്കുന്ന ജനരക്ഷായാത്രയ്ക്ക് പിന്തുണയുമായാണ് നാടകം. സഖാവിന്റെ മകള് ലൗ ജിഹാദില്പ്പെട്ട് ഭീകരവാദകേന്ദ്രത്തിലെത്തുകയും പിന്നീട് ഭാരതത്തെ അക്രമിക്കുവാന് വരുന്നതും തനിക്കുപറ്റിയ തെറ്റ് സൈനികനോട് ഏറ്റുപറയുന്നതുമാണ് കഥ. യഥാര്ത്ഥ സ്വര്ഗം ഞാന് ജനിച്ച ഭാരതമാണെന്നും മരിക്കുകയാണെങ്കില് അത് എന്റെ മണ്ണില് തന്നെയാവണം എന്നു പറഞ്ഞാണ് ലൗജിഹാദിനെതിരെ മുന്നറിയിപ്പ് നല്കുന്നത്.
സിപിഎമ്മിന്റെ അക്രമരാഷ്ടീയത്തിനും അരുംകൊലകള്ക്കും മുന്നില് ഭയന്നുവിറച്ചിരുന്നവര് പിന്നീട് അതിനെതിരെ പ്രതികരിക്കുന്നു. സിപിഎമ്മിനെതിരെ ശബ്ദമുയര്ത്തുന്നവരെ ടി.പി.ചന്ദ്രശേഖരനെ പോലെ വെട്ടിനുറുക്കിയാലോ എന്ന ഭയത്താല് മിണ്ടാതിരുന്നവര് അവസാനം മനം മടുത്ത് പ്രതികരിക്കുകയാണ്. സിപിഎം പ്രത്യയശാസ്ത്രത്തെ എതിര്ക്കുന്നവരെ വെട്ടിനുറുക്കുന്ന ചോരമണക്കുന്ന ഗ്രാമം നമുക്ക് വേണ്ട എന്ന ഉയര്ത്തെഴുന്നേല്പ്പോടെയാണ് നാടകം അവസാനിക്കുന്നത്.
ഒബിസി മോര്ച്ച തൃശൂര് ജില്ലാഅധ്യക്ഷന് രാജന് തറയിലാണ് തിരക്കഥയും സംവിധാനവും നിര്വ്വഹിച്ചിരിക്കുന്നത്. എസ് സി മോര്ച്ച സംസ്ഥാന ജന.സെക്രട്ടറി സര്ജുതൈക്കാവാണ് നാടകത്തിന്റെ കോ ഓര്ഡിനേറ്റര്. ബിനീഷ്,സുധീഷ്,രമേഷ്, മനീഷ്,രണ്ദീപ്, മേഹുല്,ധനില് ശിവറാം,വിപിന്ദാസ് എന്നിവരാണ് അഭിനേതാക്കള്.
