കണ്ണൂര്: ബിജെപി സംസ്ഥാന അധ്യക്ഷന് കുമ്മനം രാജശേഖരന് നയിക്കുന്ന ജനരക്ഷായാത്ര കണ്ണൂര് ജില്ലയിലെ പര്യടനം അവസാനിക്കുമ്പോള് സിപിഎം നേതൃത്വത്തിന് വിറളി പിടിച്ചിരിക്കുകയാണന്ന് ബിജെപി ജില്ലാ അധ്യക്ഷന് പി.സത്യപ്രകാശ് വാര്ത്താസമ്മേളനത്തില് ആരോപിച്ചു. യാത്രയ്ക്ക് സമൂഹത്തിന്റെ എല്ലാ വിഭാഗത്തില്പ്പെട്ടവരും നല്കിയവന് സ്വീകരണത്തില് അസഹിഷ്ണുത പൂണ്ടാണ് സിപിഎം ജില്ലയില് വ്യാപക അക്രമം നടത്തുന്നത്. കണ്ണൂര് ജില്ലയുടെ വിവാദ ഭാഗങ്ങളില് കഴിഞ്ഞ ദിവസങ്ങളില് സിപിഎം വ്യാപകമായി ആക്രമണവും, ബോംബേറും നടത്തികൊണ്ടിരിക്കുകയാണ്.
തലശ്ശേരിക്കടുത്ത് എരഞ്ഞോളി മലാലില് സിപിഎം ഓഫീസിലുണ്ടായ ബോംബ് സ്ഫോടനത്തെക്കുറിച്ച് സമഗ്രാന്വേഷണം നടത്തണം. ജില്ലയില് വ്യാപകമായി അക്രമം നടത്തുന്നതിന് മുന്നോടിയായി ബോംബ് നിര്മ്മാണം നടക്കുന്നതിനിടയിലാണ് മലാലില് സ്ഫോടനമുണ്ടായത്. സ്ഫോടനത്തില് നിരവധി പേര്ക്ക് പരിക്കേറ്റിട്ടുണ്ടെങ്കിലും പോലീസിന്റെ സഹായത്തോടെ പരിക്കേറ്റവരെ രഹസ്യകേന്ദ്രത്തില് ചികിത്സിപ്പിക്കുകയാണ് ചെയ്തത്. സിപിഎം നേതൃത്വത്തിന്റെ അറിവോടെ നടത്തിയ ബോംബ് നിര്മ്മാണത്തിനിടയിലുണ്ടായ സ്ഫോടനത്തില് നിരവധി പ്രവര്ത്തകര്ക്ക് പരിക്കേറ്റിട്ടുണ്ടെങ്കിലും സിപിഎം ആജ്ഞാനുവര്ത്തികളായ പോലീസ് സംഭവസ്ഥലത്ത് കയറിച്ചെന്ന് പരിശോധന നടത്താനോ അനുബന്ധ നിയമനടപടികള് സ്വീകരിക്കാനോ തയ്യാറായില്ല.
കണ്ണൂര് ജില്ലയില് യാത്രയുടെ സമാപനസമയങ്ങളില് എവിടെയും തെരുവ് വിളക്കുകള് തെളിച്ചില്ല എന്നത് ഒരു പുതിയ സംഭവം ആയിരുന്നു. ജനരക്ഷായാത്ര പരാജയപ്പടുത്താന് സിപിഎം ഔദ്യോഗിക സംവിധാനങ്ങളെയും ഉപയോഗിച്ചുവെന്നാണ് ഇത് വ്യക്തമാക്കുന്നത്. സിപിഎം പിന്തുടര്ന്ന് വരുന്ന അസഹിഷ്ണുതയാണ് ഇത്തരം സംഭവങ്ങള് വ്യക്തമാക്കുന്നത്.
സംഘര്ഷ സ്ഥലങ്ങളില് പോലീസ് ഏകപക്ഷീയമായ നിലപാടുകലാണ് സസ്വീകരിക്കുന്നത്. പോലീസ് കൃത്യവിലോപം കാണിക്കുന്നതു കൊണ്ടാണ് അക്രമികള് അഴിഞ്ഞാടുന്നത്. സിപിഎം നതൃത്വത്തിന്റെ തിട്ടൂരത്തിനനുസരിച്ചാണ് പോലീസ് പ്രവര്ത്തിക്കുന്നത്. പോലീസ് നിയമവിധേയമായി പ്രവര്ത്തിച്ചില്ലെങ്കില് പൊതുസമൂഹത്തിന് നീതിനിര്വ്വഹണത്തില് വിശ്വാസം നഷ്ടപ്പെടുമെന്നും സത്യപ്രകാശ് പറഞ്ഞു.
ബിജെപി ജില്ലാ ട്രഷറര് എ.ഒ.രാമചന്ദ്രന്, പി.എ.റിതേഷ് എന്നിവരും വാര്ത്താസമ്മേളനത്തില് പങ്കെടുത്തു.
