കണ്ണൂര്: ഗുരുവിന്റെ ഏകലോക ദര്ശനം ഇന്നും പ്രസക്തമാണെന്നും ഗുരുദേവന്റെ കാലാധിവര്ത്തിയായ ഏകലോക ദര്ശനത്തിന് പുതിയ കാലഘട്ടത്തില് പ്രസക്തി ഏറി വരികയാണെന്ന് ശ്രീനാരായണ ധര്മ്മ സംഘം ട്രസ്റ്റ് ശിവഗിരി മഠം പ്രസിഡന്റ് വിശുദ്ധാനന്ദ സ്വാമി പറഞ്ഞു. ജാതിയും മതവുമില്ലാത്ത ഏകലോകമാണ് ഗുരു സ്വപ്നം കണ്ടിരുന്നത്. എന്നാല് ജാതി ചിന്തയും മത ബോധവും മനസ്സില് മുറുകെ പിടിച്ച് ഏക ലോക ദര്ശനം പ്രസംഗിക്കുന്നവരുമുണ്ട്. അവരൊക്കെ ഗുരുവിന്റെ യഥാര്ത്ഥ ദര്ശനങ്ങളുടെ ശക്തി തിരിച്ചറിയാത്തവരാണ്. ഗുരുവിനെ ഒരു സാമൂഹ്യ പരിഷ്കര്ത്താവിന്റെ ലേബലില് മാത്രം ഒതുക്കി നിര്ത്താന് കഴിയുന്നതല്ല. ഗുരുവിന്റെ ദര്ശനങ്ങള് സായാത്തമാക്കുന്നതോടെ മാത്രമേ സത്യ ദര്ശനം സാദ്ധ്യമാകുകയുള്ളൂ.
ഗുരുവിന്റെ അദ്വൈത ദര്ശനം ലോകത്തിന് തന്നെ മാതൃകയാണ്. കഠിന തപസിലൂടെയാണ് ഗുരു ഇതൊക്കെ സാധിച്ചെടുത്തത്. അക്കാലത്ത് നിലനിന്നിരുന്ന അന്ത വിശ്വാസങ്ങളും അനാചാരങ്ങളും മാറ്റി മറിക്കാന് സാദ്ധ്യമായത് ഗുരുദേവന്റെ കര്മ്മ പദ്ധതികള് കൊണ്ടാണെന്നും അദ്ദേഹം പറഞ്ഞു. ശിവഗിരി മഹാസമാധി മന്ദിര ഗുരുദേവ പ്രതിഷ്ഠ കനക ജൂബിലി ആഘോഷത്തിന്റെ ഭാഗമായി കണ്ണൂര് ടൗണ് സ്ക്വയറില് നടന്ന ജില്ലാ ദാര്ശനിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മഹാസമാധി മന്ദിരത്തില് 1968 ല് പ്രതിഷ്ട നടത്തിയതിന്റെ കനക ജൂബിലി ആഘോഷത്തിന്റെ ഭാഗമായി ശിവഗിരി മഠത്തിന്റെ ആഭിമുഖ്യത്തില് എല്ലാ ശ്രീനാരായണീയ പ്രസ്ഥാനങ്ങളുടെയും സഹകരണത്തോടെയാണ് ചടങ്ങ് നടത്തിയത്. എസ്.എന്.ഡി.പി യോഗം പ്രസിഡന്റ് എം.എന്. സോമന് അദ്ധ്യക്ഷത വഹിച്ചു. കനക ജൂബിലി ആഘോഷ കമ്മിറ്റി സെക്രട്ടറി ശിവഗിരി മഠത്തിലെ സച്ചിദാനന്ദ സ്വാമികള് സന്ദേശം നല്കി. സ്വാമി ബ്രഹ്മ സ്വരൂപാനന്ദ ഗുരുതൃപ്പാദങ്ങളിലെ ഈശ്വരീയത എന്ന വിഷയത്തില് പ്രഭാഷണം നടത്തി.
സ്വാമി പ്രേമാനന്ദ, എസ്.എന്.ഡി.പി യോഗം ദേവസ്വം സെക്രട്ടറി സന്തോഷ് അരയാക്കണ്ടി, ശ്രീജ്ഞാനോദയ യോഗം തലശേരി പ്രസിഡന്റ് കണ്ട്യന് ഗോപി , ഭക്തിസംവര്ദ്ധിനി യോഗം കണ്ണൂര് പ്രസിഡന്റ് കെ.പി.ബാലകൃഷ്ണന്, ഗുരുധര്മ പ്രചാര സഭ പ്രസിഡന്റ് മോഹനന് പൊന്നമ്പേത്ത്, കണ്ട്യാന് ഗോപി, സോഫി വാസുദേവന്, കെ.കെ ധനേന്ദ്രന്, പി.സി. രഘുറാം, ടി.കെ. രാജേന്ദ്രന്, പി.വി. രാഘവന്, സി.സദാനന്ദന്, കെ. ശശിധരന്, കെ. ശശീന്ദ്രന്, കെ.ടി. ശ്രീധരന്, കെ.വി. അജി, ശഅരീധരന് കാരാട്ട്, പി.പി. ജയകുമാര്, എം.കെ വിനോദ്, എന്നിവര് സംസാരിച്ചു. ഭക്തി സംവര്ദ്ധിനി യോഗം സെക്രട്ടറി കെ.പി.പവിത്രന് സ്വാഗതവും എസ്എന്ഡിപി തളിപ്പറമ്പ് യൂണിയന് സെക്രട്ടറി വി.പി.ദാസന് നന്ദിയും പറഞ്ഞു.
രാവിലെ കണ്ണൂര് സുന്ദരേശ്വര ക്ഷേത്രത്തിലെ ചൈതന്യ സ്വാമി ഹാളില് പ്രാര്ഥനായോഗവും പഠനകഌസും നടന്നു. ഗുരുദേവ കൃതികളുടെ പാരായണം വിശുദ്ധാനന്ദ സ്വാമി ഉദ്ഘാടനം ചെയ്തു. സ്വാമി സച്ചിദാനന്ദ, സ്വാമി ബ്രഹ്മസ്വരൂപാനന്ദ എന്നിവര് വിവിധ വിഷയങ്ങളെ അധികരിച്ച് ക്ലാസെടുത്തു.
