കിടങ്ങൂര്: പൗരാവലിയുടെ നേതൃത്വത്തില് ഇന്ന് മീനച്ചിലാറ്റില് ചെക് ഡാം മുതല് ക്ഷേത്രക്കടവ് വരെ മത്സര വള്ളംകളി നടത്തും. ജലമേള 1.30നു മന്ത്രി പി.തിലോത്തമന് ഉദ്ഘാടനം ചെയ്യും. മോന്സ് ജോസഫ് എംഎല്എ അദ്ധ്യക്ഷനാകും. ജോസ് കെ. മാണി എംപി മത്സരങ്ങള് ഫ്ലാഗ് ഓഫ് ചെയ്യും.
പരിപാടിയോടനുബന്ധിച്ചു മീനച്ചിലാര് സംരക്ഷണ സമിതിയുടെ നേതൃത്വത്തില് ഈരാറ്റുപേട്ടയില് നിന്നു രാവിലെ എട്ടിനു ജലസുരക്ഷാ സന്ദേശയാത്ര ആരംഭിക്കും. ഭരണങ്ങാനം, പാലാ വഴി ചേര്പ്പുങ്കല് പള്ളിക്കടവിലെത്തും.
തുടര്ന്ന് നാടന് വള്ളങ്ങളുടെ മത്സരത്തോടെ കിടങ്ങൂര് ക്ഷേത്രക്കടവില് 11.30ന് സമാപിക്കും. പാലാ തോപ്പന്സ് സ്വിമ്മിങ് അക്കാദമിയും പാലാ സെന്റ് തോമസ് കോളജും തമ്മിലുള്ള വാട്ടര് പോളോ പ്രദര്ശന മത്സരവും എന്എസ്എസ് ഹയര് സെക്കന്ഡറി സ്കൂളിലെ വിദ്യാര്ത്ഥിനികളുടെ വഞ്ചിപ്പാട്ടും ഉണ്ടായിരിക്കും. നദീ സംരക്ഷണം, ജലസുരക്ഷ എന്നീ സന്ദേശങ്ങള് ഉയര്ത്തി മീനച്ചിലാര് സംരക്ഷണം എന്ന ലക്ഷ്യത്തോടെയാണു ജലമേള സംഘടിപ്പിക്കുന്നതെന്ന് മോന്സ് ജോസഫ് എംഎല്എ, പഞ്ചായത്ത് പ്രസിഡന്റ് ലിസി ഏബ്രഹാം, ജനറല് കണ്വീനര് പ്രകാശ് ബാബു എന്നിവര് പറഞ്ഞു. ചുണ്ടന് വള്ളങ്ങള്, ഇരുട്ടുകുത്തി വള്ളങ്ങള് ചെറുവള്ളങ്ങള് എന്നിവ ഉള്പ്പെടെ മുപ്പതിലേറെ വള്ളങ്ങള് മത്സരത്തില് പങ്കെടുക്കും.
ജലഘോഷയാത്ര, മാസ്ഡ്രില് തുടങ്ങിയവ മേളയ്ക്കു കൊഴുപ്പേകും. കുമരകത്തുനിന്നും കുട്ടനാട്ടില്നിന്നുമുള്ള വള്ളങ്ങളും തുഴച്ചില്കാരും മത്സരത്തില് പങ്കെടുക്കും.
