അഹമ്മദാബാദ്: ഗുജറാത്തിലെ ഗുല്ബര്ഗ സൊസൈറ്റി കൂട്ടക്കൊലക്കേസില് അന്ന് മുഖ്യമന്ത്രിയായിരുന്ന നരേന്ദ്ര മോദിയെയും അന്നത്തെ മന്ത്രിമാരും ഉദ്യോഗസ്ഥരുമടക്കം അന്പത്തിയെട്ടു പേരെയും കുറ്റവിമുക്തരാക്കിയ പ്രത്യേക അന്വേഷണസംഘത്തിന്റെ റിപ്പോര്ട്ട് ഗുജറാത്ത് ഹൈക്കോടതി ശരിവച്ചു.
സുപ്രീംകോടതി നിയോഗിച്ച പ്രത്യേക അന്വേഷണസംഘത്തിന്റെ റിപ്പോര്ട്ട് ശരിവച്ച മെട്രോപൊളിറ്റന് മജിസ്ട്രേറ്റ് കോടതി നടപടിക്കെതിരെ സാകിയ ജാഫ്രിയും തീസ്ത സെതല്വാദിന്റെ സിറ്റിസണ് ഫോര് ജസ്റ്റിസ് ആന്ഡ് പീസും നല്കിയ ഹര്ജിയിലാണ് ഹൈക്കോടതിയുടെ തീരുമാനം. കൂടുതല് അന്വേഷണത്തിന് മജിസ്ട്രേറ്റ് കോടതികളെയോ ഉയര്ന്ന കോടതികളെയോ സമീപിക്കാന് സാകിയയ്ക്ക് കോടതി അനുമതി നല്കി.
2002ലെ ഗുല്ബര്ഗ കൂട്ടക്കൊലയില് സാകിയ ജഫ്രിയുടെ ഭര്ത്താവും കോണ്ഗ്രസ് നേതാവുമായിരുന്ന എഹ്സാന് ജഫ്രി കൊല്ലപ്പെട്ടിരുന്നു. സുപ്രീംകോടതിയുടെ മേല്നോട്ടത്തിലാണ് പ്രത്യേക സംഘം കേസ് അന്വേഷിച്ചിരുന്നത്.
2012 ഫെബ്രുവരി എട്ടിന് പ്രത്യേക സംഘം മോദിയടക്കമുള്ളവരെ കുറ്റവിമുക്തരാക്കി അഹമ്മദാബാദിലെ മെട്രോപൊളിറ്റന് മജിസ്ട്രേറ്റ് കോടതിയില് റിപ്പോര്ട്ട് നല്കി. ഇതിനെതിരെ 2013 ഡിസംബറില് സാകിയ കോടതിയെ സമീപിച്ചെങ്കിലും തള്ളി. തുടര്ന്നാണ് ഹൈക്കോടതിയിലെത്തിയത്.
സുപ്രീംകോടതിയുടെ കര്ശനമായ മേല്നോട്ടത്തിലാണ് അന്വേഷണം നടത്തിയതെന്നും ഗുഢാലോചനയുടെ ഭാഗമല്ല അന്നത്തെ കലാപമെന്നും ഹൈക്കോടതിയില് സമര്പ്പിച്ച റിപ്പോര്ട്ടില് അന്വേഷണ സംഘം വ്യക്തമാക്കിയിരുന്നു.
