കോഴിക്കോട്: കേരളത്തില് ഇടത് സര്ക്കാരിന്റെ കര്ഷകദ്രോഹ നയങ്ങള് തന്നെയാണ് പുതിയ കോണ്ഗ്രസ് സര്ക്കാരും പിന്തുടരുന്നതെന്ന് ഭാരതീയ കിസാന് സംഘ് ദേശീയ ജനറല് സെക്രട്ടറി മോഹിനി മോഹന് മിശ്ര.
സംസ്ഥാന സര്ക്കാര് കര്ഷകവിരുദ്ധ നിലപാട് തിരുത്തിയില്ലെങ്കില് ബംഗാളില് കമ്മ്യൂണിസ്റ്റ് ഭരണത്തെ തൂത്തെറിഞ്ഞപോലെ കേരളത്തില് കോണ്ഗ്രസ് സര്ക്കാരിനെയും കാലാവധിയെത്തും മുമ്പേ പുറത്താക്കാന് ഭാരതീയ കിസാന് സംഘ് മുന്നോട്ട് വരുമെന്നും അദ്ദേഹം പറഞ്ഞു. ഭാരതീയ കിസാന് സംഘ് സംസ്ഥാന പ്രതിനിധി സഭ ഉദ്ഘാടനം ചെയ്യുകയായിരുന്നു അദ്ദേഹം.
സംസ്ഥാന ബജറ്റില് ഒരു ശതമാനം പോലും തുക കാര്ഷിക മേഖലയ്ക്കായി നീക്കിവെച്ചിട്ടില്ല. അന്തകവിത്തുകള് ഭാരതത്തിലെ വിപണിയിലിറക്കാന് ശ്രമിച്ച അമേരിക്കന് ഭരണകൂടത്തെപ്പോലും വെല്ലുവിളിച്ച് അവയുടെ വ്യാപനം തടഞ്ഞ ഭാരതീയ കിസാന് സംഘിന്റെ സംഘടനാശക്തി കോണ്ഗ്രസ് സര്ക്കാര് മനസിലാക്കിയില്ലെങ്കില് ഇടതുപോയ വഴിയേ ഇവര്ക്കും പോകേണ്ടി വരുമെന്നും അദ്ദേഹം ഓര്മ്മിപ്പിച്ചു.
കോഴിക്കോട് ചാലപ്പുറം കേസരി ഭവനില് നടന്ന പ്രതിനിധി സഭയില് ഡോ. അനില് വൈദ്യമംഗലം അദ്ധ്യക്ഷനായി. വിബി ജി റാം ജി കാര്ഷിക മേഖലയില് ഉള്പ്പെടുത്തുക, സംഭരിച്ച നെല്ലിന്റെ വില 24 മണിക്കൂറിനകം ഡിബിടി സംവിധാനത്തില് കര്ഷകര്ക്ക് ലഭ്യമാക്കുക, കിസാന് സമ്മാന് നിധി 6000 രൂപ സംസ്ഥാന സര്ക്കാരും നല്കുക തുടങ്ങിയ ആവശ്യങ്ങള് സമ്മേളനത്തില് ഉന്നയിച്ചു.
ആര്എസ്എസ് ക്ഷേത്രീയ പ്രചാരക് പ്രമുഖ് വി. ഉണ്ണികൃഷ്ണന് സമാപന സന്ദേശം നല്കി. ദേശീയ സമിതി അംഗം ഇ. നാരായണന്കുട്ടി, സംസ്ഥാന സംഘടനാ സെക്രട്ടറി പി. മുരളീധരന്, സംസ്ഥാന സെക്രട്ടറി പി. സുകുമാരന്, പ്രൊഫ. കോമളം ശിവരാമന്, ആര്എസ്എസ് പ്രചാരക് സി.എച്ച്. രമേശ്, സംസ്ഥാന ജനറല് സെക്രട്ടറി അഡ്വ. രതീഷ് ഗോപാലന് എന്നിവര് സംസാരിച്ചു. കേരളത്തില് പരിസ്ഥിതി സംരക്ഷണം, കര്ഷകന്റെ സാമ്പത്തിക സുരക്ഷ എന്നീ വിഷയങ്ങളില് പ്രമേയങ്ങളും അവതരിപ്പിച്ചു.
