മുംബൈ: മുംബൈ-അഹമ്മദാബാദ് ബുള്ളറ്റ് ട്രെയിന് പദ്ധതിയില് സൂറത്തിനെയും ബിലിമോറയെയും ബന്ധിപ്പിക്കുന്ന ആദ്യ ഘട്ടം 2027ല് ഉദ്ഘാടനം ചെയ്യുമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ്. രാജ്യത്തെ ആദ്യത്തെ അതിവേഗ റെയില് ഇടനാഴിയുടെ ഏകദേശം 80 ശതമാനം ജോലികളും ഇതിനകം പൂര്ത്തിയായിട്ടുണ്ടെന്നും ബാക്കി ഭാഗങ്ങള് ഘട്ടങ്ങളായി തുറക്കുമെന്നും അദ്ദേഹം മാധ്യമങ്ങളോട് പറഞ്ഞു.
സൂറത്ത് മുതല് ബിലിമോറ വരെയുള്ള ആദ്യ ഘട്ടം 2027ല് ഉദ്ഘാടനം ചെയ്യും. അതിന് ശേഷം വാപി-സൂറത്ത് സെക്ഷനും, തുടര്ന്ന് വാപി-അഹമ്മദാബാദ്, അഹമ്മദാബാദ്-താനെ, അഹമ്മദാബാദ്-മുംബൈ എന്നീ ഭാഗങ്ങളും ഘട്ടങ്ങളായി പൂര്ത്തിയാക്കും. മുംബൈ-അഹമ്മദാബാദ് ബുള്ളറ്റ് ട്രെയിന് പദ്ധതി നിശ്ചയിച്ച സമയപരിധിക്കുള്ളില് തന്നെ പൂര്ത്തിയാക്കാന് കഴിയുമെന്ന ആത്മവിശ്വാസമുണ്ടെന്നും മന്ത്രി വ്യക്തമാക്കി. പദ്ധതി പൂര്ണമായും പ്രവര്ത്തന സജ്ജമാകുന്നതോടെ മുംബൈയ്ക്കും അഹമ്മദാബാദിനും ഇടയിലുള്ള 508 കിലോമീറ്റര് യാത്രാസമയം ഏകദേശം ഒരു മണിക്കൂറും 58 മിനിറ്റുമായി കുറയും. അഹമ്മദാബാദിലെ ഗതാഗത, റെയില്വേ സൗകര്യങ്ങള് മെച്ചപ്പെടുത്തുന്നതിനുള്ള പദ്ധതികളും അശ്വിനി വൈഷ്ണവ് പ്രഖ്യാപിച്ചു.
മണിക്കൂറില് 350 കിലോമീറ്റര് വരെ വേഗത്തില് സഞ്ചരിക്കാന് കഴിയുന്ന തരത്തിലാണ് ബുള്ളറ്റ് ട്രെയിനുകളുടെ ഡിസൈന്. സര്വീസ് വേഗം മണിക്കൂറില് 320 കിലോമീറ്റര് ആയിരിക്കുമെന്നാണ് പ്രതീക്ഷ.
