തിരുവനന്തപുരം: പിഎസ്സി അതിവേഗം പരീക്ഷകള് നടത്തി ഫലം പ്രഖ്യാപിച്ചപ്പോള് റാങ്ക് പട്ടികയില് നിന്നും പുറത്തായത് നിരവധി ഉദ്യോഗാര്ത്ഥികള്. പിഎസ്സിയെ ആധുനികവത്കരിച്ചപ്പോള് പരീക്ഷാ പേപ്പറുകളുടെ സൂക്ഷ്മ പരിശോധനകള് കാര്യമായി നടന്നില്ല.
കേരള പബ്ലിക് സര്വീസ് കമ്മിഷന്റെ പുതിയ ചെയര്മാനായി ഡോ. എം.ആര്. ബൈജു ചുമതലയേറ്റെടുത്തതോടെ ഓഫീസില് ആധുനികവത്ക്കരണം അതിവേഗം നടപ്പിലാക്കി. എംടെക് ബിരുദധാരിയായ ബൈജു, എന്ജിനീയറിങ്ങില് ഡോക്ടറേറ്റ് നേടിയിട്ടുണ്ട്. തിരുവനന്തപുരം ഗവ. എന്ജിനീയറിങ് കോളജില് ഇലക്ട്രോണിക്സ് ആന്ഡ് കമ്യൂണിക്കേഷനില് പ്രൊഫസറായിരിക്കെയാണ് പിഎസ്സി അംഗമായി നിയമിതനായത്. പിണറായി വിജയന്റെ വിശ്വസ്തനാവുകയും തുടര്ന്ന് അഡ്വ. എം.കെ. സക്കീര് വിരമിച്ച ഒഴിവില് പിഎസ്സി ചെയര്മാന് സ്ഥാനത്തേക്ക് എത്തുകയുമായിരുന്നു.
പിണറായി വിജയന്റെ ഇഷ്ടം നേടിയെടുത്ത് ഓഫീസിലെ വിവിധ മേഖലകളില് പരമാവധി സാങ്കേതിക സംവിധാനങ്ങള് വരുത്തി. പരീക്ഷാ നടത്തിപ്പും ഫല പ്രഖ്യാപനങ്ങളും വളരെ വേഗത്തിലാക്കി. ഇതോടെ സര്ക്കാരിന്റെയും ഉദ്യോഗാര്ത്ഥികളുടെയും വിശ്വാസ്യത നേടിയെടുത്തു. എന്നാല് അതിവേഗം പരീക്ഷകളുടെ ഫലം പ്രഖ്യാപിച്ചപ്പോള് ഉത്തരക്കടലാസുകളുടെ സൂക്ഷ്മ പരിശോധനകളില് കാര്യമായ പിഴവ് സംഭവിച്ചു.
തസ്തികയുടെ യോഗ്യത അനുസരിച്ച് ഒബ്ജക്ടീവ് രീതിയിലോ അല്ലെങ്കില് വിവരണാത്മക രീതിയിലോ ആകാം പരീക്ഷകള്. ഒബ്ജക്ടീവ് രീതി സാങ്കേതികമായി മുല്യനിര്ണയം നടത്തുമ്പോള് വിവരണാത്മക രീതിയിലുള്ള പരീക്ഷകളുടെ ചോദ്യപേപ്പര് തയാറാക്കിയവരാണ് മൂല്യ നിര്ണയം നടത്തേണ്ടത്. വിഷയാടിസ്ഥാനത്തിലാണ് പരീക്ഷാ പേപ്പര് മുല്യനിര്ണയം നടത്തുന്നത്. ഒരു ചോദ്യ പേപ്പറില് വിവിധ വിഷയങ്ങളെ സംബന്ധിച്ചുള്ള ചോദ്യങ്ങള് ഉണ്ടാകും. അതാത് വിഷയത്തിലെ ചോദ്യങ്ങള് തയാറാക്കിയവര് തന്നെ ഉത്തരക്കടലാസുകള് മൂല്യനിര്ണയം നടത്തി മാര്ക്ക് നല്കുന്നതാണ് രീതി. എന്നാല് വളരെ പെട്ടെന്ന് റാങ്ക് ലിസ്റ്റ് പ്രസിദ്ധീകരിക്കുകയെന്ന റിക്കാര്ഡിന് വേണ്ടി പലപ്പോഴും രണ്ടാമത് പരിശോധന നടത്താറില്ല. ആസൂത്രണ ബോര്ഡിലെ മൂന്ന് ഉന്നത തസ്തികകളിലേക്ക് നടത്തിയ പരീക്ഷയില് 10 ചോദ്യങ്ങള്ക്ക് മാര്ക്കിടാനാകാത്തത് പരീക്ഷാ വിഭാഗം വീണ്ടും സുക്ഷ്മ പരിശോധന നടത്താത്തതിനാലണ്. ചോദ്യം തയാറാക്കിയ അദ്ധ്യാപകന് മൂല്യ നിര്ണയത്തിനായി ഉത്തരക്കടലാസ് നല്കിയില്ല. ഇതിലൂടെ അര്ഹരായവര് പുറത്താവുകയും ചെയ്തു. മറ്റ് പല പരീക്ഷകളുടെ മൂല്യനിര്ണയവും ഇത്തരത്തില് നടത്തിയിരിക്കാമെന്നും വിലയിരുത്തുന്നു.
നിരവധി പരാതികളാണ് പിഎസ്സിക്കെതിരെ ഉയരുന്നത്. ഗുരുതര ആരോപണങ്ങള് ഉയര്ന്നിട്ടും പിഎസ്സി ലാഘവത്തോടെ കൈകാര്യം ചെയ്യുന്നുണ്ട്. വിവാദമായ ആസൂത്രണ ബോര്ഡിലെ പരീക്ഷ പേപ്പര് മൂല്യ നിര്ണയത്തിലെ പിഴവ് അന്വേഷിച്ചതിലും ഗുരുതര വീഴ്ച സംഭവിച്ചു. പിഎസ്സി സ്വയംഭരണ സംവിധാന സ്ഥാപനം ആയതിനാല് സര്ക്കാരിന് നേരിട്ട് ഇടപെടാനും സാധിക്കില്ല. ചെയര്മാന്റെ നിയമനം നടത്തുന്നത് ഗവര്ണറായതിനാല് പരാതി ലോക്ഭവനെ അറിയിക്കാനെ സര്ക്കാരിന് സാധിക്കൂ. നടപടി ഗവര്ണര് സ്വീകരിക്കണം. നിലവിലെ ചെയര്മാന് ഇനി രണ്ട് വര്ഷം കൂടി കാലാവാധി ഉള്ളതിനാല് സര്ക്കാര് വിഷമ വൃത്തത്തിലാണ്.
