ചണ്ഡീഗഡ്: ഹരിയാനയില് പോലീസുമായുള്ള ഏറ്റുമുട്ടലില് ലോറന്സ് ബിഷ്ണോയിയുടെ കൂട്ടാളികളായ രണ്ട് പേര് കൊല്ലപ്പെട്ടു. ഒരു പോലീസുകാരന് പരിക്ക്.
ബഹാദുര്ഗഡില് ദല്ഹി പോലീസും ഹരിയാന പോലീസിന്റെ പ്രത്യേക ടാസ്ക് ഫോഴ്സും സംയുക്തമായി നടത്തിയ ഏറ്റുമുട്ടലിലാണ് തലയ്ക്ക് ഒരു ലക്ഷം രൂപ വീതം പ്രതിഫലം പ്രഖ്യാപിച്ചിരുന്ന ഹിസാര് സ്വദേശികളായ പര്വേശ്, ഹിമാന്ഷു എന്നിവര് കൊല്ലപ്പെട്ടത്. ഷൂട്ടര്മാരായ ഇരുവരുടേയും പക്കല് നിന്ന് വന്തോതില് ആയുധങ്ങളും വെടിക്കോപ്പുകളും പോലീസ് കണ്ടെടുത്തു.
ജൂണ് 11ന് ഹാന്സിയില് കപില് എന്ന ജിം ഉടമയെ പട്ടാപ്പകല് വെടിവെച്ചു കൊലപ്പെടുത്തിയ കേസിലെ മുഖ്യ പ്രതികളായ ഇരുവരും കൊലപാതകത്തിന് ശേഷം ഒളിവിലായിരുന്നു. ബഹാദുര്ഗഡ് മേഖലയില് മാരകായുധങ്ങളുമായി ഈ സംഘം മറ്റൊരു കുറ്റകൃത്യം നടത്താന് പദ്ധതിയിടുന്നതായി ദല്ഹി പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തില് പ്രതികളെ വളയുകയായിരുന്നു.
കീഴടങ്ങാന് തയാറാവാത്ത പ്രതികള് പോലീസിന് നേരെ വെടിയുതിര്ത്തു. തുടര്ന്ന് പോലീസ് നടത്തിയ പ്രത്യാക്രമണത്തിലാണ് രണ്ട് ഷൂട്ടര്മാര്ക്കും ഗുരുതരമായി പരിക്കേറ്റത്. ഇവരെ ഉടന് തന്നെ ആശുപത്രിയില് എത്തിച്ചെങ്കിലും മരിക്കുകയായിരുന്നു. അതേസമയം, ഫോറന്സിക് സംഘം സ്ഥലത്തെത്തി പരിശോധനകള് പൂര്ത്തിയാക്കി. സംഭവത്തില് കൂടുതല് അന്വേഷണം പുരോഗമിക്കുകയാണെന്നും പോലീസ് അറിയിച്ചു.
