കണ്ണുര്: ചെങ്കോട്ടകളില് പരിവര്ത്തനത്തിന്റെ ശംഖൊലിയുമായി ജനരക്ഷാ യാത്ര.ചെങ്കോട്ടകളെ കാവിയണിയിച്ച് യുപി മുഖ്യമന്ത്രി യോഗി ആദിത്യ നാഥിന്റെ പ്രയാണം. ബിജെപി സംസ്ഥാന അധ്യക്ഷന് കുമ്മനം രാജശേഖരന് നയിക്കുന്ന ജിഹാദി-ചുവപ്പ് ഭീകരതയ്ക്കെക്കെതിരെയുള്ള ജന രക്ഷായാത്രയില് കീച്ചേരിയില് നിന്നാണ് യോഗി ആദിത്യനാഥ് ഇന്നലെ രാവിലെ അണിചേര്ന്നത്.
അഭിപ്രായ-പ്രവര്ത്തന സ്വാതന്ത്ര്യം നിഷേധിക്കപ്പെട്ട കീച്ചേരി, കല്യാശ്ശേരി തുടങ്ങിയ ഇടതു കോട്ടകള് അക്ഷരാര്ത്ഥത്തില് ഞെട്ടിത്തരിപ്പിച്ചു കൊണ്ടായിരുന്നു യാത്രയില് ആയിരങ്ങള് അണിനിരന്നത്. ഇ.കെ.നായനാര്, ഇഎംഎസ് ഉള്പ്പെടെയുള്ള ഒന്നിലധികം ഇടത് മുഖ്യമന്ത്രിമാരെ സമ്മാനിച്ച ഇടത് മണ്ണ് യാത്രയെ ഇരുകൈകളും നീട്ടി ഹൃദയത്തോട് ചേര്ത്ത് വെയ്ക്കുന്ന കാഴ്ച യ്ക്കാണ് ഇന്നലെ സാക്ഷ്യം വഹിച്ചത്.
പാപ്പിനിശ്ശേരിയും, ബ്രിട്ടീഷുകാര് തകര്ത്ത വല്ലഭന് കോട്ടയും, കോലാധിനാഥന്റെ ചിറക്കല് കോവിലകവും, പള്ളിക്കുന്നും കടന്ന് കണ്ണൂര് നഗരത്തിലെത്തിയപ്പോള് ആവേശം അലതല്ലി. ഇരുളടഞ്ഞ ചുവപ്പ് മണ്ണില് ദേശീയതയുടെ പൊന് വെളിച്ചം വിതറി കൊണ്ട് ജനരക്ഷായാത്ര പ്രയാണം തുടരുന്നത്.
യാത്രയില് രണ്ടാം ദിവസം പങ്കാളികളായത് പതിനായിരങ്ങളാണ്. യാത്രയിലെ സ്ഥിരാംഗങ്ങള്ക്ക് പുറമേ തളിപ്പറമ്പ്, അഴീക്കോട നിയോജകമണ്ഡലങ്ങളിലെ പ്രവര്ത്തകരും ഇന്നലെ ജാഥയില് പങ്കെടുത്തു.
സ്ത്രീകളും കുട്ടികളും യുവാക്കളുമുള്പ്പടെ ആബാലവൃദ്ധം ജനങ്ങളും യാത്രയില് പങ്കാളികളായി. യാത്രയില് പങ്കെടുക്കാനെത്തിയ ഉത്തര്പ്രദേശ് മുഖ്യമന്ത്രി യോഗി ആദിത്യനാഥിനെ ഭാരത് മാതാ കീ ജയ് വിളികളോടെ പ്രവര്ത്തകര് സ്വീകരിച്ചു. കേന്ദ്ര ധനകാര്യ സഹമന്ത്രി രാജീവ് പ്രതാപ് ശുക്ല, ബിജെപി അഖിലേന്ത്യാ സഹ സംഘടനാ സെക്രട്ടറി ബി.എല്.സന്തോഷ്, സുരേഷ് ഗോപി എംപി തുടങ്ങിയവരും യാത്രയില് പങ്കാളികളായി. ശക്തമായ വെയില് വകവെക്കാതെ പതിനഞ്ച് കിലോമീറ്റര് ദൂരം പദയാത്രയില് പങ്കെടുത്ത യോഗി ആദിത്യനാഥിനെ കാണാന് ദേശീയ പാതയ്ക്കിരുവശവും ആയിരങ്ങളാണ് തടിച്ച് കൂടിയത്. യാത്ര കടന്ന് പോകുന്ന വഴികളിലുടനീളം യോഗി ആദിത്യനാഥ്, അമിത് ഷാ തുടങ്ങിയ നേതാക്കള്ക്ക് സ്വാഗതമോതി കൂറ്റന് ബോര്ഡുകള് സ്ഥാപിച്ചിരുന്നു.
ദേശീയപാതയില് വാഹന ഗതാഗതം തടസ്സപ്പെടാതെ ഒരുവശത്ത് കൂടി വാഹനം കടത്തിവിട്ടുകൊണ്ടാണ് യാത്ര ക്രമീകരിച്ചത്. രാവിലെ 11 മണിക്ക് കീച്ചേരിയില് നിന്നാരംഭിച്ച ജനരക്ഷായാത്ര വിവിധ കേന്ദ്രങ്ങളിലെ ആവേശോജ്ജ്വലമായ സ്വീകരണങ്ങള്ക്ക് ശേഷം വൈകുന്നേരം ആറ് മണിയോടെ കണ്ണൂര് സ്റ്റേഡിയം കോര്ണറില് സമാപിച്ചു. തുടര്ന്ന് സ്റ്റേഡിയം കോര്ണറില് നടന്ന പൊതുസമ്മേളനത്തെ അഭിസംബോധന ചെയ്ത് ആദിത്യനാഥ് സംസാരിച്ചു. ഇന്ന് രാവിലെ മമ്പറത്ത് നിന്നാരംഭിക്കുന്ന യാത്ര പിണറായി വഴി തലശ്ശേരിയില് സമാപിക്കും. യാത്രയില് ബിജെപി അഖിലേന്ത്യാ അധ്യക്ഷന് അമിത് ഷാ പങ്കാളിയാകും.
ഇന്നലെ യാത്രയില് സുരേഷ് ഗോപി എംപി, ബിജെപി നേതാക്കളായ എം.ടി.രമേശ്, പി.കെ.കൃഷ്ണദാസ്, കെ.സുരേന്ദ്രന്, എ.എന്.രാധാകൃഷ്ണണന്, സി.കെ.പത്മനാഭന്, പ്രമീള സി നായ്ക്, കെ രഞ്ജിത്ത്, പി.സത്യപ്രകാശ്, കെ.കെ.വിനോദ് കുമാര്, വി.മുരളീധരന്, മഹിളാ മോര്ച്ച സംസ്ഥാന പ്രസിഡണ്ട് രേണു സുരേഷ് തുടങ്ങിയവര് പങ്കെടുത്തു.
