കാഞ്ഞങ്ങാട്: ജോലി സ്ഥലത്തു നിന്നും പൊന്നാനി ഇസ്തുല് ഇസ്ലാം മത പഠന കേന്ദ്രത്തിലേക്ക് പോയ യുവതിയെ കാഞ്ഞങ്ങാട് ജുഡീഷ്യല് മജിസ്ട്രേറ്റ് കോടതി വീട്ടുകാര്ക്കൊപ്പമയച്ചു. ബേക്കല് പുതിയ കടപ്പുറത്തെ മീര (20)യെയാണ് മതപഠന കേന്ദ്രത്തില് നിന്നും കണ്ടെത്തിയത്. പാലക്കുന്നിലെ തൊഴില് പരിശീലന കേന്ദ്രത്തില് നിന്ന് പരിശീലനം പൂര്ത്തിയാക്കി ഒരുവര്ഷം മുമ്പ് ആലുവയിലെ ഒരു തുണിക്കടയില് ജോലി ചെയ്യുകയായിരുന്ന മീര കഴിഞ്ഞ മൂന്ന് മാസം മുമ്പാണ് പെരിന്തല്മണ്ണയിലെ തുണിക്കടയില് ജോലിക്കെത്തിയതെന്ന് പോലീസ് പറഞ്ഞു. അതേ കടയിലുള്ള യുവാവുമായി സൗഹൃദത്തിലാകുകയും അയാളുടെ നിര്ദ്ദേശ പ്രകാരം മതപഠന കേന്ദ്രത്തിലെത്തിപ്പെടുകയുമായിരുന്നു.
മൂന്നു ദിവസം മുമ്പ് മീരയുടെ അടുത്ത ബന്ധുവിന്റെ മകനുമൊന്നിച്ച് തൃക്കണ്ണാട് ത്രയംബകേശ്വര ക്ഷേത്രത്തില് ദര്ശനം നടത്തി കുറുംബാ ഭഗവതി ക്ഷേത്രത്തിനടുത്തെത്തിയപ്പോള് ബന്ധുവിനെ ഒഴിവാക്കി തനിച്ച് പോവുകയായിരുന്നു. വൈകുന്നേരമായിട്ടും മകള് തിരിച്ചെത്താത്തതിനാല് പിതാവ് ബേക്കല് പോലീസ് സ്റ്റേഷനില് പരാതി നല്കുകയായിരുന്നു. വീട്ടില് നിന്ന് മീര ഇറങ്ങുന്നതിന് മുമ്പേ വീട്ടിലുണ്ടായിരുന്ന മൊബൈല് ഫോണില് നിന്നും സൗഹൃദത്തിലായ യുവാവിന്റെ ഉമ്മയെ വിളിച്ചതായും കണ്ടെത്തിയിരുന്നു. ഇതിന്റെ അടിസ്ഥാനത്തില് നടത്തിയ അന്വേഷണത്തിലാണ് മതപഠന കേന്ദ്രത്തിലെത്തിയതായി പോലീസിന് വിവരം ലഭിച്ചത്. ഇന്നലെ വൈകുന്നേരം ഹൊസ്ദുര്ഗ്ഗ് കോടതിയില് ഹാജരാക്കപ്പെട്ട മീരയെ വീട്ടുകാര്ക്കൊപ്പമയച്ചു.
