പള്ളുരുത്തി: നിര്മ്മാണം പൂര്ത്തിയാകാത്ത കണ്ണങ്ങാട്ട്-ഐലന്റ് പാലത്തിന്റെ ഉദ്ഘാടനം ഇന്ന് നടക്കും. മന്ത്രി ജി. സുധാകരനാണ് ഉദ്ഘാടനം ചെയ്യുന്നത്. പല തവണ മാറ്റിവെക്കപ്പെട്ട ഉദ്ഘാടനം കഴിഞ്ഞ 9ന് നടത്താന് നിശ്ചയിച്ചിരുന്നുവെങ്കിലും അവസാന നിമിഷം വീണ്ടും മാറ്റുകയായിരുന്നു. അപ്രോച്ച് റോഡ് നിര്മ്മാണം പൂര്ത്തിയാകാത്തതാണ് ഉദ്ഘാടനം മാറ്റാന് കാരണമെന്നായിരുന്നു ഔദ്യോഗിക വിശദീകരണം.
ഇടക്കൊച്ചിയോട് സര്ക്കാര് കാട്ടുന്ന അവഗണനയില് പ്രതിഷേധിച്ച് വിവിധ സംഘടനകള് രംഗത്തുവന്നിരുന്നു. ഉദ്ഘാടനച്ചടങ്ങ് മാറ്റി വെച്ചപ്പോഴുണ്ടായിരുന്ന സാഹചര്യം തന്നെ ഇപ്പോഴും നിലനില്ക്കുമ്പോഴാണ് വീണ്ടും ഉദ്ഘാടന ചടങ്ങ് നടത്തുന്നതെന്ന് നാട്ടുകാര് ആരോപിക്കുന്നു. ഒരു വര്ഷം മുന്പു പാലത്തിന്റെ നിര്മ്മാണം പൂര്ത്തിയായി കഴിഞ്ഞിരുന്നുവെങ്കിലും അപ്രോച്ച് റോഡ് നിര്മ്മാണം പൂര്ത്തിയാക്കിയില്ല.
പാലത്തിലേക്ക് പ്രവേശിക്കുന്നിടത്തെ കലുങ്ക് ബലക്ഷയം സംഭവിച്ച് തകര്ന്നിരിക്കുകയാണ്. പാലത്തിലേക്കെത്താന് പ്രധാന റോഡില് നിന്നുള്ള റോഡ് വീതികൂട്ടി ടാര് ചെയ്തിട്ടുമില്ല. ഇത്രയേറെ പണികള് ബാക്കിനില്ക്കെ ഇതൊന്നും വകവെയ്ക്കാതെ ഉദ്ഘാടനം നടത്തുന്ന സര്ക്കാര് നടപടിക്കെതിരെ പ്രതിഷേധം ശക്തമാവുകയാണ്.
