കണ്ണൂര്: എല്ലാ തദ്ദേശസ്ഥാപനങ്ങളും മാലിന്യ സംസ്ക്കരണവുമായി ബന്ധപ്പെട്ട പ്രൊജക്ടുകള് നിര്ബന്ധമായും സപ്തംബര് 25നകം സമര്പ്പിക്കണമെന്ന് ജില്ലാ ആസൂത്രണ സമിതി യോഗം നിര്ദേശിച്ചു. ഗ്രാമ പഞ്ചായത്ത്, നഗരസഭ, കോര്പ്പറേഷന് അടിസ്ഥാനത്തില് മാലിന്യ സംസ്ക്കരണത്തിനും ശേഖരണത്തിനും ഏതെങ്കിലും ഒരു സ്ഥിരം സംവിധാനം വേണമെന്ന് ഹരിത കേരളം മിഷന്റെ ഭാഗമായി സംസ്ഥാന സര്ക്കാര് നിര്ദേശിച്ചിട്ടുണ്ട്. ഇതിനായി 20 ലക്ഷം രൂപ ശുചിത്വ മിഷന് വഴി നല്കും. ബാക്കി ആവശ്യമായ തുക അതത് തദ്ദേശ സ്ഥാപനങ്ങളുടെ ഫണ്ടില് നിന്നാണ് വിനിയോഗിക്കേണ്ടത്. പ്രൊജക്ടുകള് തയ്യാറാക്കി സമര്പ്പിക്കാന് സപ്തംബര് 28 വരെയാണ് സമയം അനുവദിച്ചിരിക്കുന്നത്.
ഹരിത കേരളം മിഷന്റെ ഭാഗമായി മികച്ച പ്രവര്ത്തനങ്ങള് നടന്ന ജില്ലയില് മാലിന്യ സംസ്ക്കരണ സംവിധാനങ്ങള് ഒരുക്കുന്നതിനുള്ള പ്രൊജക്ട് തയ്യാറാക്കുന്നതില് വേണ്ടത്ര പുരോഗതി ഇല്ലെന്ന് യോഗത്തില് അധ്യക്ഷത വഹിച്ച ജില്ലാ ആസൂത്രണ സമിതി ചെയര്മാന് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് ചൂണ്ടിക്കാട്ടി. തദ്ദേശസ്ഥാപന ഭരണസമിതികള് ശക്തമായ ഇടപെടല് നടത്തി അടിയന്തരമായി പ്രൊജക്ടുകള് തയ്യാറാക്കി സമര്പ്പിക്കണമെന്നും പ്രസിഡണ്ട് ആവശ്യപ്പെട്ടു.
യോഗത്തില് ജില്ലാ പ്ലാനിങ്ങ് ഓഫീസര് പി.പ്രകാശന്, ജില്ലാ ആസൂത്രണ സമിതി അംഗങ്ങളായ കെ.പി.ജയബാലന് മാസ്റ്റര്, ടി.ടി.റംല, അജിത് മാട്ടൂല് തുടങ്ങിയവര് പങ്കെടുത്തു.
