മട്ടാഞ്ചേരി: ത്രൈമാസ കാലാവധിക്ക് ദിവസങ്ങള്‍ മാത്രമിരിക്കെ റേഷന്‍ കാര്‍ഡുടമകള്‍ക്ക് മണ്ണെണ്ണ വിഹിതം വര്‍ദ്ധിപ്പിച്ചു. എല്ലാ കാര്‍ഡുടമകള്‍ക്കും കാര്‍ഡ് ഒന്നിന് ഒരു ലിറ്റര്‍ മണ്ണെണ്ണ ലഭിക്കും. നിരക്ക് 71 രൂപ. ജൂണ്‍ 30 നകം വിതരണ കാലാവധി തീരുന്ന 2025- 26 വര്‍ഷ ആദ്യ ത്രൈമാസ (ഏപ്രില്‍ – ജൂണ്‍) തോതിലാണ് 20ന് വര്‍ദ്ധന ഉത്തരവിറക്കിയത്.
റേഷന്‍ കടകളിലൂടെയുള്ള മണ്ണെണ്ണ വിതരണം കുറഞ്ഞതിനെതുടര്‍ന്ന് അധിക നീക്കിയിരിപ്പുള്ളതിനാലാണ് വിതരണതോത് വര്‍ധിപ്പിച്ചതെന്നാണ് അധികൃത അറിയിപ്പില്‍ പറയുന്നത്.
സംസ്ഥാനത്ത് 13,000ല്‍ ഏറെ റേഷന്‍ കടകളിലും വന്‍ തോതില്‍ മണ്ണെണ്ണ നീക്കിയിരുപ്പുണ്ടെന്നാണ് റേഷന്‍ വൃത്തങ്ങള്‍ ചുണ്ടിക്കാട്ടുന്നത്. വില്പന കുറയുന്നതും നീക്കിയിരുപ്പും തുടര്‍ന്നും കേന്ദ്ര സര്‍ക്കാര്‍ നല്‍കുന്ന സംസ്ഥാന വിഹിതം കുറയാനിടയാക്കുമെന്നാണ് ചുണ്ടിക്കാട്ടുന്നത്. പരമ്പരാഗത മത്സ്യതൊഴിലാളി മത്സ്യബന്ധന മേഖലയിലും ഇത് പ്രതിഫലിക്കുമെന്നും ബന്ധപ്പെട്ടവര്‍ പറയുന്നു.
