പാലക്കാട്:സ്വാമിനാഥന്റെയും പ്രേമകുമാരിയുടെയും കൊലപാതകം ഏറെ ഞെട്ടലോടെയാണ് തോലനൂര്കാര് കേട്ടത്. ഏവര്ക്കും പ്രിയപ്പെട്ട അപ്പുവേട്ടന്റെ മരണം വിശ്വസിക്കാനാവാതെ നാട്ടുകാര് ഒന്നടങ്കം പൂളയ്ക്കല് പറമ്പിലെ വീട്ടില് ഒഴുകിയെത്തി.തോലന്നൂര് ‘അമ്മ തിരുവടി’ പാടശേഖര സമിതിയുടെ സെക്രട്ടറിയും പൊതുവെ ശാന്തശീലനായിരുന്ന സ്വാമിനാഥന്റെയും ഭാര്യ പ്രേമകുമാരിയുടേയും കൊലപാതകത്തിന്റെ ഞെട്ടലില് നിന്ന് തോലനൂരും പരിസരവും ഇനിയും മുക്തമായിട്ടില്ല. ഇന്നലെ പുലര്ച്ചെ പാല് വില്പനക്കാരിയായ രാജലക്ഷ്മി പതിവു പോലെ എത്തിയപ്പോള് പാത്രം കാണാത്തതിനെ തുടര്ന്ന് നടത്തിയ അന്വേഷണത്തിലാണ് മരുമകള് ഷീജയെ കയ്യും കാലും കെട്ടിയ നിലയില് കണ്ടെത്തിയത്. തുടര്ന്ന് നടത്തിയ പരിശോധനയിലാണ് ഇരുവരുടെയും മൃതദേഹങ്ങള് കണ്ടെത്തിയത്.
റിട്ട.മിലിട്ടറി ഉദ്യോഗസ്ഥന് കൂടിയായ സ്വാമിനാഥനെതിരെ രണ്ട് വധശ്രമങ്ങള് ഉണ്ടായിരുന്നതായി പോലീസില് പരാതി നല്കിയിരുന്നു. എന്നാല് കോട്ടായി പൊലീസ് ഇത് കാര്യമായെടുത്തില്ല. ഇന്നലെ വിവരം അറിഞ്ഞെത്തിയവര് സ്വാമിനാഥന്റെയും പ്രേമകുമാരിയുടേയും ക്രൂരമായ കൊലപാതകം കണ്ട് ഞെട്ടി. ഹാളില് ് സ്വാമിനാഥനെ വെട്ടിയും കുത്തിയുമാണ് കൊലപ്പെടുത്തിയത്. കുടല്മാല പുറത്തു വന്ന നിലയിലായിരുന്നു. അദ്ദേഹത്തിന് ഒന്നിലധികം കുത്തേറ്റിട്ടുണ്ട്.
പ്രേമകുമാരിയെ സമീപത്തെ മുറിയില് ശ്വാസം മുട്ടിച്ചാണ് കൊലപ്പെടുത്തിയത്. സ്വാമിനാഥന്റെ സഹോദരന് ചന്ദ്രനാണ് മൃതദേഹങ്ങള് ആദ്യം കണ്ടത്. ഇതിനിടെ അബോധാവസ്ഥയിലായിരുന്ന മരുമകള് ഷീജയെ ജില്ലാ ആശുപത്രിയിലേക്ക് മാറ്റിയിരുന്നു. അതോടെ സംഭവം അറിഞ്ഞെത്തിയ നാട്ടുകാര് പ്രതിഷേധത്തിലായി.
ഉന്നത പോലീസ് ഉദ്യോഗസ്ഥര് എത്തിയ ശേഷം മാത്രം മൃതദേഹങ്ങള് ആശുപത്രിയിലേക്ക് മാറ്റിയാല് മതിയെന്ന് നാട്ടുകാര് നിലപാട് സ്വീകരിച്ചു. വിവരം അറിഞ്ഞ് ക്രൈംബ്രാഞ്ച് ഡിവൈ.എസ്.പി പി. ശശികുമാറിന്റെ നേതൃത്വത്തില് വന് പോലീസ് സന്നാഹം ആദ്യം സ്ഥലത്തെത്തി. പിന്നീട് ഐ.ജി എം.ആര്. അജിത് കുമാറും എസ്.പി ദേബേഷ് കുമാര് ബഹ്റയും സ്ഥലം സന്ദര്ശിച്ചു.
