മഞ്ചേശ്വരം: കുഴല്പ്പണക്കടത്തുകാരന് മദ്യക്കടത്ത് തടയാന് ബസില് പരിശോധന നടത്തുകയായിരുന്ന എക്സൈസ് സംഘത്തിന്റെ പിടിയിലായി. മംഗളൂരുവില് നിന്നും കാസര്കോട്ടേക്ക് വരികയായിരുന്ന കെഎസ്ആര്ടിസി ബസിലെ യാത്രക്കാരനായ മംഗളൂരു വിദ്യാനഗരയിലെ ഇ.റഹ്മത്തുല്ല(40)യാണ് പിടിയിലായത്. ഇന്നലെ വൈകുന്നേരം മഞ്ചേശ്വരത്ത് എക്സൈസ് സ്പെഷല് സ്ക്വാഡ് ബസുകള് തടഞ്ഞ് പരിശോധന നടത്തുന്നതിനിടെയാണ് അഞ്ചുലക്ഷത്തോളം രൂപയുടെ കുഴല്പ്പണവുമായി റഹ്മത്തുല്ല കുടുങ്ങിയത്.
കര്ണാടകയില് നിന്നും ബസുകളില് വന്തോതില് മദ്യം കടത്തുന്നത് പതിവായ സാഹചര്യത്തിലാണ് എക്സൈസ് മദ്യവേട്ടക്കിറങ്ങിയത്. കാസര്കോട്ടേക്ക് വരികയായിരുന്ന കെഎസ്ആര്ടിസി ബസ് മഞ്ചേശ്വരത്ത് തടഞ്ഞിട്ട ശേഷം സ്ക്വാഡ് യാത്രക്കാരെ ഇറക്കി പരിശോധന നടത്തുകയായിരുന്നു.
ഈ ബസിലെ യാത്രക്കാരനായ റഹ്മത്തുല്ലയും പരിശോധനക്ക് വിധേയനായി. ഇതിനിടെയാണ് റഹ്മത്തുല്ലയുടെ അരയില് സൂക്ഷിച്ചിരുന്ന പണം എക്സൈസ് കണ്ടെത്തിയത്. പണത്തിന്റെ രേഖകള് കാണിക്കാനോ പണം എന്തിനു വേണ്ടിയാണെന്ന് ബോധിപ്പിക്കാനോ കഴിയാതിരുന്നതിനാല് റഹ്മത്തുല്ലയെ എക്സൈസ് കസ്റ്റഡിയിലെടുക്കുകയും തുടര്ന്ന് മഞ്ചേശ്വരം പോലീസിന് കൈമാറുകയും ചെയ്തു.
പോലീസ് റഹ്മത്തുല്ലക്കെതിരെ കേസ് രജിസ്റ്റര് ചെയ്ത് അറസ്റ്റ് രേഖപ്പെടുത്തുകയും ചെയ്തു. റഹ്മത്തുല്ല പലര്ക്കായി പണം വിതരണം ചെയ്തു വരികയായിരുന്നുവെന്നും ഇതിനായി മറ്റാരോ ഇയാളെ പണമേല്പ്പിച്ചതാണെന്നും പോലീസ് വ്യക്തമാക്കി. കുമ്പള സി ഐ വി.വി.മനോജിന്റെ നേതൃത്വത്തിലാണ് ഈ കേസില് അന്വേഷണം നടക്കുന്നത്.
കുഴല്പ്പണം സംബന്ധിച്ച് കൂടുതല് കാര്യങ്ങള് വെളിപ്പെടുത്താന് റഹ്മത്തുല്ല തയ്യാറായിട്ടില്ലെന്നും നിയമവിരുദ്ധമായി പണം കൈവശം വെച്ചതിനാണ് ഇപ്പോള് കേസെടുത്തിരിക്കുന്നതെന്നും സി ഐ പറഞ്ഞു. എക്സൈസ് സ്പെഷല് സ്ക്വാഡിലെ സി ഐ വിനോദ് ബി നായരുടെ നേതൃത്വത്തിലാണ് മഞ്ചേശ്വരത്ത് ബസ് തടഞ്ഞ് പരിശോധന നടത്തിയത്.
